滑稽戏

滑稽戲，一種戲種，起源勒蘇州，在拉上海搭周邊地區一度流行個喜劇表演方式。迭個藝術基本上向使用上海閒話，同時模仿多許吳語太湖片方言。有常時也模仿北方官話、粵語咾啥個語言。

一個人唱個滑稽戲叫「獨腳戲」。抗日戰爭中期，從上海個「獨腳戲」開始，吸收中國劇種、外國喜劇、鬧劇搭仔江南各地戲曲，逐眼形成功滑稽戲迭個新戲曲劇種。因為表演閒話是吳語，個咾只勒上海、江蘇、浙江等吳語區流行。

二十世紀後半葉，滑稽戲經歷仔一個從發展個高峰到滑落個過程。在拉上海，五十年代之後，以姚慕雙搭仔周柏春為代表個新一代滑稽大師一改陳風，剔除脫低級庸俗個下作噱頭，擔文言詩詞、英文、科學技術等等有檔次個內容加進來，反響邪氣好，滑稽戲也是空前個繁榮。但不過，自從1980年代開始強制推廣普通話之後，滑稽戲個地位就慢慢能開始、外加弗斷能個邊緣化。在拉《老娘舅》、《紅茶坊》之類個電視滑稽戲紅極一時仔以後，基本進入到後繼無人個局面；阿末一個用滑稽戲個獨腳戲方式表演並出名個人物是周立波——2000年代末腳，伊成為仔上海滑稽戲個頭面人物。但是因為伊講過一眼真心言話，就畀北方交關「明星」以及高層抵制咾封殺脫，只好跑路，到北美去哉。

到2010年代，滑稽戲徹底成為邊緣藝術模式。現實當中，上海個多數居民已經開始對迭只藝術形式陌生起來，有得交關年輕人從來弗曾聽歇過、弗曾看歇過滑稽戲。在拉媒體上向，伊拉也無任何突破；甚至有得弗弗少少滑稽戲劇團個成員，跑到購物頻道去推銷中老年用品，帶來仔邪氣大個負面影響。

2021年，上海黃浦區一個滑稽戲表演當中，畀外地人直接罵要伊拉用普通話表演，弗要講上海話。之後網絡上向對迭個事體有過一眼反應討論，但不過動靜也弗大——迭個也從另外一面反映出滑稽戲個邊緣地位。