第一次世界大战

第一次世界大戰(WWI 或者WW1)是20世紀人類爆發過個兩場頂頂激烈個全面戰爭之一。迭個戰爭從1914年7月28號開始，一直持續到1918年11月11號終結。衝突辰光超過4年，參加個國家包括世界上所有主要個列強。個當中，德意志帝國、奧匈帝國、奧斯曼帝國為首結成個同盟國對大英帝國、法蘭西第三共和國、沙皇俄國為首個協約國發起挑戰，企圖顛覆維也納會議之後個歐洲搭世界霸權形式。戰爭主要立在歐洲戰場進行，分成東西兩條戰線。立在阿拉伯半島、巴勒斯坦、膠州灣以及東非等地區，列強和相互進行過小規模戰爭。1917年，沙皇俄國發生革命，之後退出戰爭，美國參戰。1918年，奧斯曼帝國搭奧匈帝國先後戰敗投降，德意志帝國獨木難支，終於爆發政變，推翻自家個皇帝威廉二世。到1918年11月11號，簽署投降書，戰爭結束。

1914年兩大集團結盟形勢圖

影響

第一趟世界大戰徹底改變歐洲主宰世界個格局。老早中歐搭東歐個四大帝國——德意志帝國、奧匈帝國、奧斯曼帝國搭沙皇俄國全部崩潰。美國總統威爾遜鼓吹民族自決，讓此地個民族主義者有機會創造自家個民族國家。弗過因為手段太快，帶來邪氣多個後遺症。立在俄國，布爾什維克掌握政權，建立蘇聯，成為共產主義奪得控制權個模板。立在意大利王國，因為戰爭回報太推板，讓交關軍人搭老百姓弗滿意，造成法西斯主義個興起。立在德國，因為戰敗帶來個賠償讓老百姓弗能理解接受，造成極端思潮興起。讓希特勒有參與政治個可能。立在英國，大批貴族立在弗蘭德斯死脫，造成平民主義搭工會政治興起，大英帝國個霸權嚴重削弱。