第一趟鸦片战争

第一趟鸦片战争（First Opium War）是1839年9月4号到1842年8月29号（道光十九年七月廿七号到道光廿二年七月廿四号），清朝搭英国为贸易爆发个战争。战争个直接起因是鸦片贸易，直接导火线是清帝国个钦差大臣林则徐来勒广东虎门销烟，战争个结果是英国获得胜利，清朝失败，个场战争也畀交关历史学者认为是近代历史个开端。

战争背景

帝国个闭关

1757年，清帝国为加强对南方各省控制，避免洋人搭东南居民过多接触，关闭江、浙、闽三海关，只留广州作为唯一城市，开始搞一口通商。1759年（乾隆廿四年），帝国进一步限制外国人来帝国贸易，批准两广总督奏报个《防范外夷规条》，除脱严格限制洋人贸易外，更规定交关商品弗允许出口。

外国商人只好来勒广州各十三行进行贸易，实行公行制度，让英国为代表个西方商人蒙受老大个损失。

英国来勒印度个鸦片储存库

贸易逆差

英国是欧洲头号强国。18世纪末，来勒工业革命后，国内生产能力邪气大个提高，更加需要一个大市场作为伊拉货品个出口地，但帝国个闭关政策，让伊拉个想法落空。迭个辰光个帝国，搭历史高头一样，对外来物品没啥大个兴趣。反过来恐惧这些“奇技淫巧”让统治弗稳，危害伊拉个江山。但英国人来勒另外一方面对帝国出口个瓷器搭茶叶有交关需求。这就让两边个贸易逆差一直老大。

外交凌辱

乔治·马戛尔尼伯爵

1793年（乾隆五十八年），英使乔治·马戛尔尼来帝国，目的是要求帝国开放口岸，但帝国以为伊是向乾隆皇帝贺寿个，所以拿使团带来个礼品当成是贡物。又因为马戛尔尼坚持弗肯三跪九叩，让帝国官僚搭皇帝侪老生气，最后一拍两散，啥结果也没达成。

1816年（嘉庆廿一年），英国又派阿美士德来帝国，希望改善对帝国个通商关系。阿美士德也因为拒行内亚式个三跪九叩礼，畀驱逐，朆搭嘉庆皇帝会面。

1833年，又爆发珠江口鸦片争端，个件事体也是后来冲突个预演。