脚踏车 - Wikiwand

1766年，一幫修士修復達文西徠1490年作个手稿箇朞，發現最早个腳踏車雛型，不過朆老實造出，只有箇想法階段。

法國人西夫拉克一個落雨天架，徠街裏畀經過个四輪馬車整身爛泥灒起，箇一灒渠突發奇想：四輪馬車馨闊，應該畀馬車解兩段，四個擂盤變前後兩個……。於是來1791年，第一部代步个「木馬輪」小車造出。部小車有前後兩個木擂盤，中央一根橫檔連牢，上向一張凳頭緔耷，搭玩具樣。部「木馬輪」雖然講嘸鏈條，也嘸龍頭，不過一般當作人類最早个腳踏車。

1818年，德國管林人德萊斯也一部雙輪車做起，渠徠前輪腿一個打方向个龍頭加起。不過踏車到叫舊要用到兩隻腳踏地，策會讓車摸頭擂。1840年，蘇格蘭个鐵匠麥克米倫，徠德萊斯發明个木輪車个基礎上進行改進。渠徠後輪腿个軸裏緔彎柄，再用連杆畀彎柄搭頭前个腳踏連牢，前後輪都用鐵造，前輪大，後輪細。馨若人雙腳策弗落地，用雙腳个交換踏畀擂盤帶動讓車摸頭前駛。1842年，麥克米倫踏箇車，一日功夫踏20公里。

1861年，法國个米肖孃兒，徠前輪裏合一個好旋个腳踏，坐墊架前輪上向。渠裏畀部車名字「腳踏車」，咦徠1867年巴黎博覽會上展出。

從西夫拉克一落地到米肖孃兒，渠裏做个腳踏車搭瑲朞个腳踏車差蠻多，種弗帶鏈條傳動系統个腳踏車為了提高速度只好提高前輪个直徑實現，造成車高險，前輪个直徑比公道人个身長都長，騎腳踏車變成邪气危險个運動，踏個人擂得地裏來都會受傷。正當性有現代化形式个腳踏車徠1874年造出来。英國人羅松徠腳踏車上向緔鏈條和齒輪盤，用後輪个轉動帶動車順駛。

1886年英國个機械工程師約翰•斯塔利，從機械學、運動學个角度設計出新个腳踏車樣式，合上前叉搭車閘，前後輪大小一式來保持平衡，用鋼管做菱形个車架，還頭垡用橡膠輪腿。斯塔利弗單改進腳踏車个結構，還改做無數生產腳踏車部件用个機床，為腳踏車大量生產搭推廣應用開闊路，怪得渠畀後人謳作「腳踏車之父」。渠設計个腳踏車車型搭瑲朞个腳踏車範子基本一式。

1888年，愛爾蘭个獸醫約翰•登祿普，從醫牛肚氣膨脹中得到啟示，畀屋裏花園用來澆水个橡膠管畀起圓形氣打起足緔腳踏車裏，箇便是充氣輪腿个起頭。充氣輪腿是腳踏車發展史裏个劃時代創舉，弗單從大橦頭改變腳踏車个騎行性能，咦完善腳踏車个用功。

中国大陆

腳踏車大約莫徠1875年傳到中國，腳踏車最初謳「洋馬」。對中國人來講，「洋馬」是新奇个物事。當時个刊物《點石齋畫報》便好幾垡畀外國人踏腳踏車當新聞。

1922年，讓位皇帝溥儀結婚朞，渠堂哥溥佳一部腳踏車送畀渠。有大臣猴咄溥佳，講弗應該畀箇危險个物事畀皇帝。不過溥儀朆恤著大臣个反對，十把日功夫便要得踏腳踏車爻，成為中國歷史上唯一一個踏腳踏車个皇帝。聽講，溥儀早時為踏腳踏車畀皇宮裏全部个地栿頭都拆爻。

臺灣

臺灣腳踏車是臺灣日治時代辰光东洋人带进去个，伊辰光照日語講「自轉車」。1898年，日本第一間自轉車廠「宮田製銃所」畀國產腳踏車送皇太子，些數腳踏車進口臺灣。照總督府統計，1930年代，臺灣每三戶便有一部腳踏車，相當普遍，當時个照片也顯示商店街个「亭仔腳」到處望得著買物事要勿運送所踏个腳踏車帶起。戰後中華民國政府遷臺，「自行車」、「腳踏車」用詞策傳得臺灣，一般民眾畀鏈條落爻个情況講「落鏈」。1990年代，臺灣成為全球製造腳踏車个重要生產地之一，市占率超過50％。

事实速览