龙柏街道

龍柏街道是上海市閔行區老底子一隻街道，東到新涇港、虹橋鎮、虹井路，西到北橫涇，北到長寧區，南到七寶鎮、虹橋鎮，面積4.54平方公里^[1]，2000年成立，2010年拆分撤銷哉^[2]。

歷史

街道建立前

主文章：虹橋鎮（上海市）

1949年5～7月，上海市軍事管制委員會新涇區接管委員會先後設5隻辦事處，管理6隻鎮、69隻行政村、386隻自然村。1950年6月份，因為龍華區面積忒大，虹橋鎮蒲匯塘以南部分劃畀新涇區，設虹橋鄉搭仔新涇鄉。^[3]。伊辰光，箇地方是西郊村，歸新涇鄉管。^[3]1956年3月份，新涇、虹橋兩鎮幫新涇區一道撤銷，並進西郊區^[4]。1958年8月份，上海市西郊區諸翟、寶北、寶南、莘莊、朱行、西郊6鄉，七寶鎮全部搭仔虹橋、華村、上中、華漕4鄉部分地區劃畀上海縣^[5]。

1992年7月份，虹橋鄉西郊村劃畀長寧區新涇鎮，農副工業管理也劃畀長寧區^[6]。同年，上海縣撤銷改閔行區，虹橋鄉撤鄉改鎮。1994年，為咾解決西郊村「一塊土地，兩隻政府」個問題，西郊村再劃畀虹橋鎮，閔行、長寧東面按照徐虹支線、西面按照滬青平公路中心線重劃區界。^[6]

街道成立

1997年，龍柏新村街道成立，主要是原虹橋鎮西郊村、先鋒村、華光村地塊，轄區包括龍柏新村、金匯花園、華光村。^[7][6]

2000年10月8號，上海市人民政府下發文件^[8]，批准龍柏新村街道幫航華街道合併建立龍柏街道。^[9]

拆分撤銷

2009年9月份，根據「大虹橋」地區發展方案，龍柏街道辦事處消息人士表示，要沿牢滬青平公路成立「新虹橋街道」，拿龍柏街道撤銷脫。^[10]

上海市人民政府下發文件仔麼^[11]，閔行區勒垃同年10月24號舉行新虹街道成立大會，撤銷龍柏街道，龍柏街道個箇批人基礎建立新虹街道，暫駐航西路1號。新虹街道幫七寶鎮、虹橋鎮個分界是滬渝高速^[12]。根據箇拆分方案，龍柏新村、金匯花園、虹光村儕劃畀虹橋鎮；航華新村片區一劈兩，滬渝高速南面分畀七寶鎮；外環線以西、滬渝高速以北個劃畀新虹街道^[13]。

知名人物

「開心小屋」

主文章：鮑美利

鮑美利是位聲樂教師，退休前勒垃上海樂團做生活。1996年，鮑美利一家從黃浦區原人民廣場街道動遷動到龍柏三村。2006年，居委會組織社區老年人開座談會，鮑美利就勒垃屋裡向開仔一禮拜一趟個「愛心小屋」活動，深受當地居民好評。箇活動模式搭仔經驗畀其他地方認為是「開創鄰里養老新路」^[14]。鮑美利夫婦也因此勒垃2012年4月份進仔中央文明辦發布個「中國好人榜」^[15]。

參見

• 閔行區、上海縣
• 虹橋鎮（上海市）、虹橋機場、虹橋商務區、虹橋街道（上海市）