衢州清真寺

衢州清真寺，是吳越浙江省衢州市个一隻清真寺。老底子个清真寺勒拉浮石門裏向个西馬路丄，是清朝手裏造个，後首來到1956年畀颱風吹倒脱哉。第歇个衢州清真寺勒拉市區下街6號。

歷史

清朝康熙手裏，有姓李、馬、嚴、季个回民打山东咾、安徽咾、杭州咾搬到衢州。^[1][2]老早渠拉大部分蹲拉縣學街个”回教弄堂“（徽州會舘東牆外），大部分做小生意，也有人蹲拉下街、東門第橫頭。渠拉講閒話个辰光專門介講”法西“（波斯閒話），有辰光夾一眼阿拉伯閒話，再加衢州口音，老一輩回回三種閒話並用个習慣是蠻多个。^[1]

民國《衢縣志》裏向寫：“囘囘敎禮拜堂，堂名清真寺，俗名囘囘堂。在浮石門內西馬路，建築頗爲古樸。其種人來衢當在清初康熙時至雍正間，遂建此堂居。”^[1][3]清真寺造拉浮石門（北門）裏向个西馬路拱宸巷，同治兩年（1863年）修繕過。^[1]

1927年，河南柘城人韩品三阿訇当衢州清真寺教长。^[4]1949年，韩品三阿訇回到河南哉咾，衢州清真寺个教务也停脱哉。^[2]1952年恢复活动。^[2]1956年，清真寺畀台风吹倒脱哉，碑刻咾额匾咾全无得拉哉。^[1]

1958年，買脫下街10號房15間作清真寺，^[5]1963年个辰光有信徒105個人，文化大革命个辰光，寺畀人佔脫咾活動停脫哉。^[2]1982年有1個阿訇，235個信徒。^[2]1988年11月份成立衢州市回教事務工作委員會，借用水亭街2號當臨時清真寺搭開會个場許。^[2][5]1996年，衢州市伊斯蘭教協會籌資50來萬塊洋錢，拉市中心下街造仔一隻兩門面4屋樓个清真寺，佔地100平方米，建築面積410平方米。^[6]第歇个切脚是下街6號。^[7]