评弹

評彈，又叫稱蘇州評彈、說書或者叫南詞，是蘇州評話搭彈詞個總稱。是一門古老、優美個說唱藝術。 評話通常一個人登台開講，內容大部分儕是金戈鐵馬個歷史演義搭叱咤風雲個俠義豪傑。彈詞一般兩個人說唱，上手持三弦，下手抱琵琶，自彈自唱，內容大部分儕是兒女情長個傳奇小說搭民間故事。 彈詞儕用吳音演唱，抑揚頓挫，輕清柔緩，弦琶琮錚，非常悅耳。經過之歷代藝人個創造發展，曲調流派紛呈，風格各異。搿個四十幾年來，評彈從內容到形式儕推陳出新，傳統書目得到之整理提高，反映現實生活個新編書目陸續湧現，中篇搭短篇等新個演出形式也日臻完善。 兩零零六年五月廿號，蘇州評彈經國務院批准列入第一批國家級非物質文化遺產名錄。

歷史

評彈起源勒嘞山明水秀個江南水鄉——蘇州，流行於富饒漂亮個長江三角洲地區。勒四百多年前個明代，蘇州地區已經有之說書活動哉。據吳縣志記載：「明清兩朝盛行彈詞、評話，二者絕然不同，而總名皆曰說書，發源於吳中。」潘心伊勒《書壇話墮》一文當中介紹，清朝乾隆皇帝到蘇州個辰光，曾經拿當地一個姓王個說書藝人召的來，彈唱一段《游龍傳》。搿個人叫王周士，俚晚年創立之評彈歷史浪第一個行會組織——光裕公所。 光裕社成立之後，評彈藝術得到之迅速個發展。勒清嘉慶、道光年間，出現之陳遇乾、俞秀山、毛菖佩、陸世珍搿幾個前四大名家。前四大名家個高超技藝，提高之評彈藝術個總體水平，也擴大之評彈個影響。 到之清同治、光緒年間，評彈（搿許辰光又叫蘇州說書）演出已經不局限於蘇州地區。1846年，上海開阜以後，經濟搭文化儕以交關快個速度發展起來，人口也日益膨脹。雖然說搿搭五方雜處，但不過蘇南人最多，其中蘇州地區個人所占比例特別高，一度上海出現「街頭巷尾盡吳語」個情景。評彈進入上海以後，落地生根，勒藝術個深度、廣度搭高度浪發展，受到之上海人個厚愛。 搿許辰光，勒蘇滬地區又出現之以馬如飛、姚時章、趙湘洲、王石泉組成個後四大名家為代表個一大批評彈藝術家，搿是評彈藝術成熟個標誌，也為以後個大發展奠定之基礎。從二十世紀初開始，評彈活動個中心，已經從蘇州轉移到之上海，再以上海為中心，往長江三角洲地區輻射，評彈幾乎涵蓋之整個江浙水鄉，還遠到北京、天津、武漢等地。以後個五十年，是評彈發展個全盛時期：名家輩出，流派紛呈，好節目層出不窮。名家像張雲亭、朱耀庭、謝少泉、楊月槎、魏鈺卿、黃兆麟、蔣如亭、汪雲峰、周玉泉、許繼祥、夏荷生、沈儉安、薛筱卿、徐雲志、李伯康、朱介生、姚蔭梅、 劉天韻、祁蓮芳、張鴻聲、張鑒庭、嚴雪亭、蔣月泉、楊振雄、朱慧珍、侯莉君、徐麗仙、何占春，王鷹等；好節目有：《楊乃武與小白菜》、《張文祥刺馬》、《十美圖》、《顧鼎臣》、《啼笑因緣》、《秋海棠》、《孟麗君》、《四進士》、《情探》、《秦香蓮》、《武松》、《林沖》、《三笑》、《玉蜻蜓》、《描金鳳》、《倭袍傳》、《白蛇傳》、《珍珠塔》、《筱丹桂之死》等。 五十年代初，上海市人民評彈工作團搭蘇州市人民評彈團等專業演出團體相繼成立，搿點團體集中之搿許辰光評彈界個弗少精英，俚哚編演之一大批轟動一時個好作品，進一步開拓之評彈市場，還拿搿門藝術個水準推向之新個高峰。以後，因為各種原因，評彈經歷之艱難曲折，出現式微個徵候。但不過勒二十世紀末，長江三角洲地區，還有幾十隻專業團體搭幾百個演員，勒嘞演出。

流派

大致可分三大流派，也就是陳（遇乾）調、馬（如飛）調、俞（秀山）調。經過一百來年個發展，又弗斷出現繼承搿三個名家風格，又有創造發展自成一家個新流派。像"陳調"個繼承人劉天韻、楊振雄；"俞調"個繼承者夏荷生、朱慧珍，俚哚儕自成一家。其中「馬調」對後世影響最大，幾花繼承並自成一派者，像薛（筱卿）調、沈（儉安）調、「琴調」（朱雪琴在「薛調」基礎上的發展）。周（玉泉）調是勒「馬調」基礎浪個發展，而蔣（月泉）調又出自「周調」，搿浪發展繁衍形成之蘇州評彈流派唱腔千姿百態個興旺景象。

演出形式

評彈用個語言是蘇州吳語，有單檔、雙檔、三個檔、小組唱、表演唱、大合唱等多種形式，其中以雙檔最為常見。

表演分為說、噱、彈、唱、演五個方面。

說：演員通過語言來講述故事、描述環境、製造氣氛搭刻畫人物 噱：書中個笑料，來引起聽眾對演出個興趣 彈、唱：評彈個音樂部分 演：主要包括「手面」搭「起角色」 手面：手個動作運用搭面部表情 起角色：演員模仿書中人物個音容笑貌，讓聽眾勒視覺上搭聽覺浪，對書中角色有一個具體生動個印象

類型

• 長篇評彈
• 中篇評彈
• 短篇評彈
• 評彈選回

參考文獻

1. 楊振雄簡介 ．中國評彈網 [引用日期2012-10-22] 。
2. 蘇州評彈·中國最美的聲音 ．中國評彈網 [引用日期2012-10-13] 。
3. 曲起蘇州六百年 ．蘇州新聞網 ．2012-06-29 [引用日期2012-10-21] 。
4. 長篇彈詞《筱丹桂之死》說紅二十年 ．中安在線 ．2004-08-20 [引用日期2012-10-22] 。
5. 陳雲與評彈界交往紀事（上） ．中央文獻研究室官網 [引用日期2012-10-21] 。
6. 吳宗錫：評彈精華五十年流失七成 ．網易 ．2009-06-16 [引用日期2012-10-25] 。
7. 徐雲志的情趣瑣事 ．網易 ．2011-08-02 [引用日期2012-10-12] 。