越绝书

《越絕書》所記載個內容以春秋末年到戰國初期吳越爭霸個歷史事實為主幹，上溯夏禹，下迄兩漢，旁及諸侯列國，對搿一歷史時期吳越地區個政治、經濟、軍事、天文、地理、曆法、語言等幾花方面儕有涉及。其中有種記述，現存其他典籍文獻儕看弗見個，只有搿本書獨詳；有種記述，倒可以搭其他典籍文獻互為發明，彼此印證。勒現代社會科學個研究過程中，有弗少人，從弗同角度、勒弗同程度浪利用《越絕書》，來考察中國古代史、中國文學史、漢語語言學史、中國民族史、中國歷史地理中個弗少具體問題，也取得之弗少重要成果。

作者

關於《越絕書》個作者《隋書•經籍志》認為是子貢，其實應該弗是。 搿本書末尾序外傳記有隱語：「以去為姓，得衣乃成，厥名有米，復之以庚。」搿個隱語裡向囥之「袁康」兩個字。又有「禹來東征，死葬其疆」。搿兩句表明作者是會稽人；又云：「文詞屬定，自於邦賢；以口為姓，承之以天，楚相屈原，與之同名」搿幾句里向又囥之「同郡吳平」個名。 所以《四庫全書總目提要》判定搿本書作者為漢朝個袁康搭吳平，搿兩個人個生平已經呣沒辦法考證哉。

內容

《越絕書》是記載古代吳越地方史個雜史，又叫《越絕記》，全書一共十五卷。搿本書雜記春秋戰國個辰光吳越兩國個史實，上溯夏禹，下迄兩漢，旁及諸侯列國，對搿一歷史時期吳越地區個政治、經濟、軍事、天文、地理、曆法、語言等方面儕有涉及。 關於書名由來「越絕」，首篇《外傳本事》說：「越者，國之氏也。絕者，絕也，謂勾踐時也。」「賢者，所述不可斷絕，故不為記明矣。」清代個俞樾對搿點作之解釋，搿是講《春秋》絕筆於獲麟之絕，意在記吳、越個事體來續補《春秋》，而重點是關於越，所以叫，「越絕」。 搿本書原來有三十五篇，所謂「舊有內記八，外傳十七」；北宋初丟脫之五篇，現在只剩十九篇。其中首尾兩篇屬於序跋性質，中間十七篇有內經、內傳搭外傳，顯得比較雜亂。但不過《外傳本事》解釋說：「經者論其事，傳者道其意，外者非一人所作，頗相覆載，或非其事，引類以托意說之者。」搿一方面說明俚個材料來源是多方面個，另外一方面說明之，作者著書個意圖，每篇儕有俚個特定個目的，所謂「觀乎太伯，能知聖賢之分」，「觀乎九術，能知取人之真，轉禍之福」等等。 《越絕書》保存有吳、越地區東漢以前個弗少史料，特別注重伍子胥、子貢、范蠡、文種、計倪等人個外交軍事活動；有種畀《史記》採用，譬如說勾踐行計倪、范蠡之術，俚個道理勒富米貴谷。搿點史料可以搭《左傳》、《國語》跟《史記》互相印證，補充其不足。 還有《外傳記寶劍》一篇，記述歐冶子、干將兩個人幫越王鑄之五口寶劍，又幫楚王鑄之三口寶劍，儕鋒利無比。後來考古發掘證明《越絕書》浪記載個煉劍個事體是真實個。還有篇中所謂「以石為兵」、「以玉為兵」、「以銅為兵」、「以鐵為兵」個記載，大體浪反映之今朝考古學浪個舊石器、新石器、銅器搭鐵器時代。 勒《越絕書》個成書年代、作者、卷數、書名、篇名等問題浪，到現在還存在弗少弗同個看法。譬如說關於成書年代，有春秋說、戰國說、戰國―西漢―東漢說、戰國―東漢說、東漢初年說、東漢末年說、東漢初年―東漢末年說、西晉說；關於作者，有子貢撰說、子胥撰說、袁康撰說、袁康、吳平合撰說、袁康撰吳平修訂說、袁康、吳平輯錄說；關於卷數，有十五卷說、十六卷說；關於書名，有《越絕書》原稱《越絕》說、《越絕書》原稱《越絕記》說、《越絕記》非《越絕書》說；關於篇名，有吳太伯與兵法篇亡佚說、今本吳地傳也就是古本吳太伯篇說、伍子胥水戰兵法內經也就是古本兵法篇說、今本陳成恆弗是古本陳恆篇說，等等。 《越絕書》，畀東漢著名學者王充稱搿許辰光個五大名著之一。書名曰「絕」，舊有「斷滅」等說法，今人考證，應當是上古越語「記錄」個譯音，是越國史記個專名。《越絕書》內容非常廣泛豐富，詳細記載之吳越交戰、越王勾踐生聚教訓，最後興越滅吳，逐鹿中原個經過，內容涉及兵法、權謀、術教等，畀有種學者稱為「復仇之書」。還記載之弗少有關季節變化、農田水利、土地利用、糧食豐歉等內容，因此畀弗少學者視為一本發展生產、經世致用之書。書中《吳地傳》搭《地傳》兩篇，詳細記述之吳越兩國個山川、地理、物產等，所以畀有種學者尊為中國地方志個鼻祖。《越絕書》弗僅是浙江最早個地方志，也是國內現存最古個地方志。搿本書還保存之先秦個辰光弗少珍貴個思想史資料，有種記述，可以搭其他典籍文獻互為發明，彼此印證，所以一直畀學者重視。 　歷代個抄本、刻本有翻元本（越絕書十五卷江安傅氏雙鑒樓藏明雙栢堂刊本雙柏堂本）、張佳胤本、陳塏刊本、古今逸史本、四庫全書本等版等等。研究成果有清人個兩種，一為俞樾越絕書札記曲園雜纂，一為錢培名所作，刻入小萬卷樓叢書。

目錄

第一卷 越絕外傳本事第一 越絕荊平王內傳第二

第二卷 越絕外傳記吳地傳第三

第三卷 越絕吳內傳第四

第四卷 越絕計倪內經第五

第五卷 越絕請糴內傳第六

第六卷 越絕外傳紀策考第七

第七卷 越絕外傳記范伯第八 越絕內傳陳成恆第九

第八卷 越絕外傳記地傳第十

第九卷 越絕外傳計倪第十一

第十卷 越絕外傳記吳王占夢第十二

第十一卷 越絕外傳記寶劍第十三

第十二卷 越絕內經九術第十四 越絕外傳記軍氣第十五

第十三卷 越絕外傳枕中第十六

第十四卷 越絕外傳春申君第十七 越絕德序外傳記第十八

第十五卷 越絕篇敘外傳記第十九