越国
From Wikipedia, the free encyclopedia
Remove ads
越国（也称为于越、于越[1]），是春秋战国时期勒中国东南方个诸侯国，都城勒嘞会稽（绍兴）。越国前期个核心统治区域主要勒今朝个浙江省诸暨、东阳、义乌搭绍兴周边地区，俚个早期都城就勒个块区域内迁移，最早个首都是勒今朝个诸暨，后来定都会稽（绍兴）。公元前473年，越国灭脱吴国后，势力范围一度北达江苏北部，东濒东海，西达皖南、赣东，雄踞东南。
Remove ads
起源
我伲所晓得个春秋五霸个勾践卧薪尝胆也就是第三十九代越王。史书浪讲越国是夏朝少康庶子于越个后裔[2]，国君姓姒[3]。但根据考古学浪个发现，越国更加有可能是继承仔太湖地区个马桥文化[4]，是古代百越当中个于越人建立个国家。《国语》当中记载越国国君是姓芈个。
历史
公元前496年，吴王阖闾派兵攻打越国，但不过畀越国打败，阖闾也伤重死脱哉。两年后阖闾个儿子夫差带兵打败越国，越王勾践押送到仔吴国做奴隶，勾践忍辱负重伺候吴王三年过后，夫差再对俚消除仔戒心拿俚送回越国。
其实浪勾践并呣没忘记脱复仇，俚表面浪对吴王服从，但不过暗中训练精兵，强政励治，等待时机反击吴国。勾践怕自家会贪图眼门前个安逸，消磨脱报仇个意志，所以俚帮自家安排仔艰苦个生活环境。俚夜里向困觉弗用褥，只铺点柴草（古代叫薪），又勒窝里挂仔一只苦胆，俚一直会尝苦胆个味道，就是为仔弗忘记过去个耻辱。
勾践为鼓励民众，搭王后跟人民一淘参加劳动，勒越人同心协力之下让越国强大起来，并最终寻准仔机会，灭脱仔吴国。
勾践平定吴国之后，就出兵往北渡过黄河，勒徐州搭齐、晋诸侯会合，进献贡品畀周天子。周元王派人赏赐祭祀肉畀勾践，称俚为“伯”。勾践离开徐州，渡过淮河南下，拿淮河流域送畀楚国，拿吴国侵占个宋国个土地还畀宋国。拿泗水以东方圆百里个土地畀仔鲁国。个许辰光，越军勒长江、淮河之东畅行无阻，各个诸侯侪来庆贺，越王号称霸王[5]。为仔继续称霸，勾践拿越国个首都迁到仔琅琊（今朝个连云港）。到越王翳（前379年）个辰光，越国国力减退，又迁都回到仔江东个姑苏（今朝个苏州）。
前312年，勒秦国、韩国、魏国搭楚国、齐国对峙个辰光，楚国派大批军队包围仔秦兵勒曲沃搭商于。越王勒个个辰光派使者以“乘舟”（君王坐仔用来指挥作战个大船）、战船三百艘、箭五万支，送畀魏国来支持魏国。[6]个点水战所需个军用物资运输到魏都大梁，一定要从长江经邗沟，再经淮水搭鸿沟，可以推断出个许辰光邗沟搭淮水还勒越国个势力范围之内。个许辰光越王原本要讨伐齐国，经过齐王派人游说越王，越弗攻齐而攻楚，畀楚打败。
所以楚国想要灭脱越国，来消除后顾之忧。个浪做，也能扩展领土到江东一带。公元前307年，秦武王举鼎绝膑而死，秦国有仔争立君位个内乱，勒个许辰光，楚国就趁个个机会攻打越国。楚国曾经派大臣昭滑到越国去调查仔5年，到公元前306年（楚怀王二十三年），楚国乘越国内乱个辰光，联合仔齐国一淘进攻越国，占领仔越国勒原来属于吴国故地个国都，杀脱仔越王无强，拿原来吴国一直到浙江（今朝个钱塘江）个土地全部攻下来，设江东为郡，越国政权灭脱。
Remove ads
越国君主列表
语言文化
越国通行个应该是百越当中个于越语。从《史记》、《吴越春秋》等书当中可以看出来越国个语言文化应该是跟吴国差大弗多个。勒春秋后期，越国掌握仔用鸟篆书写个能力。
参考资料
Wikiwand - on
Seamless Wikipedia browsing. On steroids.
Remove ads