运动学

运动学（kinematics）是力学个一门分支，专门描述物体个运动，也就是物体拉空间中个位置随辰光个演进而作个改变，完全弗考虑作用力或质量等影响运动个因素。运动学搭动力学弗同，动力学专门研究造成运动或影响运动个各种因素。

运动学里向，任何一样物事，假使好忽略其内部个相对运动，其内部每一部分侪朝相同方向、以相同速度移动，个么就好拿个只物事看成质点，拿质心位置当作质点个位置。运动学里向，最基本个研究对象就是个种质点运动。

假使弗好忽略物体内部个相对运动，个么当解析其运动个辰光，必须先拿物体理想化成刚体，也就是一群相对距离弗变个质点。涉及到刚体个问题交关困难，因为刚体可能会进行平移运动、旋转运动或者两者侪有。更困难个是多刚体系统个运动。