闵行博物馆

闵行博物馆，来勒上海市闵行区七宝镇新镇路1538号（闵行文化公园三期地块里向），隔壁是上海海派艺术馆、宝龙美术馆，是主要展示马桥古文化搭中国民族乐器个国家三级博物馆。

历史

图为已拆除个莘庄地铁站裙楼，正门通往原闵行博物馆

名都路85号，闵行区图书馆、档案馆、博物馆大门

闵行博物馆前身是闵行区文物陈列室^[1]，1958年11月份造个，本名上海县博物馆，设勒闵行工人俱乐部里向。1961年，因为闵行地区划畀徐汇区哉，上海县博物馆搬去莘庄。文化大革命个辰光，文化馆、图书馆、博物馆三馆合一，文物工作由上海县文化馆领导。1980年秋，上海县文化馆设立文物室，地址设勒莘庄镇莘建路237号。1986年8月份，文物室搬到莘松路378号个县文化馆新馆西大楼二楼。1993年3月份，上海县建制撤销哉，上海县文物陈列室改叫闵行区文物陈列室。^[2]

2002年5月份，闵行博物馆筹备新馆址。2003年，闵行博物馆造勒莘建东路255号个莘庄地铁站高头，总建筑面积4200平方米，展览面积1920平方米。莘建东路馆址有两个主要展厅。马桥古文化陈列馆里向展出马桥遗址出土个200多件器物，分别属于良渚文化、马桥文化、春秋战国到唐宋元时期，展示上海古海岸线上个原始文明；中国民族乐器陈列馆展厅里向陈列有300多件古今乐器，介绍中华民族乐器个分类搭发展，还介绍乐器发声原理咾啥个科学知识^[3][4]。

2010年，闵行博物馆搬去名都路85号二楼个临时馆址^[5]。2012年，闵行博物馆新馆项目正式开工^[6]。2019年1月19号，新镇路个新馆正式开放，展厅总面积达5400平方米^[7][8]。

设展

闵行博物馆设有“上海县七百年展”“马桥文化展”“中国民族乐器文化展”等，当中，马桥文化展厅展出距今3900~3200年前马桥文化时期个150多件器物，还有“互动魔墙”文物查询互动屏幕、“敦煌乐舞”多媒体秀场、“族乐锦绣”多媒体投射互动区等互动式展示项目。^[9]

备注

• 根据中华人民共和国国家文物局公布个《2016年全国博物馆名录》显示，闵行博物馆下头还有只张充仁纪念馆^[10]。