良渚文化
From Wikipedia, the free encyclopedia
Remove ads
良渚文化是新石器時代文化，距瑲約莫5300到4000年光景[1]，也有認為距瑲約莫6000到5000年光景個[2]。良渚文化分布個中心地帶勒環太湖地區，遺址分布最密集個地區是勒太湖流域個東北面、東面搭東南面，極盛個辰光到過淮河一帶[3]。箇中，良渚遺址作為餘杭縣個良渚、瓶窯、安溪三鎮之間弗少遺址個總稱，1936年勒浙江杭縣（今朝餘杭）畀人發現，1959年依照考古慣例命名。
良渚先民用石犁耕地，吃稻米，有原始文字，故咾良渚文化畀人認為是中國史前文明個重要搖籃。良渚玉器標示文明時代個到來，幫北方個龍山文化交流弗少。距瑲4000年光景，良渚文化消亡，技術倒退成自給自足個馬橋文化。
Remove ads
政治
良渚文化個政治模式是酋邦，也便是一隻最高酋長控制個一系列村莊聚落或者社區。良渚文化裏頭，各個酋邦組作聯盟。佢已經有大型祭祀場地、城牆、防洪牆。
佢個政治體系神權色彩濃重，有多隻分化個社會階層，包括王搭王族、貴族、工匠搭武士、平民許。箇中，玉器搭玉器上頭個徽章，還有各許禮器，按照階層弗同講究險。王會戴玉三叉形器、玉椎形器、玉梳背搭玉半圓形飾，還擁有代表至高王權搭教權個良渚象牙權杖；貴族也戴玉梳背搭玉三叉形器，隨葬品一般是玉琮和玉鉞；工匠搭武士戴數量少眼個玉椎形器，隨葬品有石鉞、石璧。平民也可能有玉椎形器搭石鉞。
佢有至少三級聚落，包括住10000到30000人個都邑（比方良渚王城）、環壕組成個區域中心（比方臨平玉架山遺址）搭住40-60人個基層聚落（比方海鹽仙壇廟遺址）。
宗教
良渚聚落中心都有宗教祭祀個土墩。莫角山遺址有規格頂高個宗教祭壇，反山、瑤山遺址有兩隻殯葬祭壇。玉琮象徵教權，有精粗大小區別，上頭徽章也有扗講究，因之，代表個權威也有差別。
良渚文化頂要緊個徽便是人面獸面紋，佢是一隻戴羽冠個人面、人個脊身、一隻獸面搭獸個脊身（帶爪）組成，人個下半身搭獸個脊身貤共用起，脊身上頭都有紋樣。對佢個意義，有多種講法。有認為箇獸是大蟲個，也有人認為是在騎豬。人面獸面紋按照完整性搭樣子弗同，有無數種形式，代表弗同個權威，包括完全個人面獸面紋、簡略獸面紋搭各許。
吳越歷史上一向有鳥崇拜個傳統，箇也是良渚文化重要個組成部分。箇中有「鳥立高台」玉璧、鳥形玉、鳥紋。鳥紋主要來勒玉琮、冠狀飾、玉璜搭三叉形器上頭。
文字
良渚文化已經有形成中個文字系統或原始文字，刻勒玉器搭陶器上頭，圖形規範化，畀人認為有義涵。
住民搭相關研究
復旦大學個李輝個研究指出，良渚住民個DNA主要是瑲朞南島民族中央高頻分佈高單倍群O-M119（O1a）（2.1萬年共同祖宗）；箇基因在現代浙江佔比接近25%，顯示良渚人搭南島搭壯侗族群個血緣關係。
對前南島人（Pre-Austronesians）個研究裏頭，有一派認為揚子江三角洲極有可能是南島語族個起源地。佢侇相關族群有可能在公元前10000年到6000年，從閩江三角洲移居台灣。語言、考古搭遺傳學證據證明，前南島人搭揚子江流域個早期農耕文化聯繫密切。佢侇展現出典型個南島人標誌，括拔牙、黑牙、玉雕、紋身、巢居、先進個造船、水產養殖、濕地農業搭豬、狗、雞馴化技術。
對壯侗搭南島語系個大南方假說認為兩者可能是前南島語後裔，有姊妹關係。各許學者有人表示質疑，也有人有構建還要廣泛語系聯繫個打算。
物事
玉器
良渚文化個玉器品類豐富、數量奇多，雕琢精細。玉器有璧、琮、鉞、璜、冠許器型，還有玉三叉形器、玉鐲、玉管、玉珠、玉墜、柱形玉器、錐形玉器、玉帶、玉環許。
陶器
良渚文化陶器主要是灰黑陶，輔夾砂紅陶，陶器風行圈足搭平底，陶壺貫耳多。製作陶器用快輪技術。福泉山等大墓隨葬個陶鼎、陶壺有許有精緻刺紋搭彩繪。早期陶器個代表在錢山漾、張陵山許遺址：陶器主要是灰陶，也有眼黑皮陶， 器形有魚鰭形足個鼎、袋足、 鏤孔豆、貫耳壺、球腹罐、附耳杯、附耳、大口圜底缸搭各許。晏期陶器主要在良渚、雀幕橋許遺址：陶器多泥質黑皮陶，還有薄胎黑陶，器形有斷面呈丁字形足個鼎、竹節形把個豆、貫耳壺、貫耳罐、侈口圓腹罐、簋、大圈足盤、寬把帶流杯搭各許。
漆器
反山、瑤山墓葬出土爻漆器，箇中有玉嵌在裏頭個。
絲綢
良渚文化壞出土爻絲綢，比方，在錢山漾遺址發現爻囥在竹篚裏頭個絲帶搭絲帛。
石器
良渚文化出現扁平長方形穿孔石斧搭有段石錛，適合建構干欄建築。耕具有石犂、耘田器搭石鐮許。禮器也有石製，比方，福泉山遺址用玉少，大件琮、璧有石質。
王墓
良渚國王畀人認為埋在反山12號墓，按照復原，佢頭戴特殊長玉璧、玉梳背、玉三叉形器，頭正面是成組組成扇形個玉椎形器。佢頭頸戴玉管串，胸頭板一梗有兩端個首飾、有瑁個玉鉞搭良渚象牙權杖，手爭頭戴玉鐲搭玉琮。墓裏頭還有鑲插端飾、嵌玉漆盤、嵌玉漆杯、長管、陶罐、陶鼎、榫頭端飾、大口缸。
反山12號墓個玉琮王是玉琮裏向個頂精品，是頂權威個禮器，是王權搭教權個象徵。佢中央中空，外層方圓筒形，裏層圓形，重3.5公斤，人面獸面紋搭獸面紋精緻險。
紋樣
良渚文化有無數紋樣，主要是動物，有鱷魚、鹿、烏龜、鳥、蛇、蠶、魚、大蟲、蝦、鹿、狗搭各許。[4]螺旋、鳥紋許都是長見元素。
Remove ads
生活
環境
良渚住民生活在生物種群豐盈個宕地，當時氣候也比瑲朞暖無數。良渚遺址在個天目山餘脈上頭河網、濕地密布，礦產、森林豐盈。
喫
良渚住民飯稻羹魚。
良渚文化稻作農業發達。在各個遺址當中，廣泛發現爻稻穀搭稻米遺存。佢侇已經發明出兩種新形制個石犁，進行犁耕。佢侇還種植蔬菜、瓜果搭油料作物搭採集野生植物，比方講錢山漾遺址便有出土爻葫蘆、花生、芝麻、蠶豆、甜瓜子、兩角菱、毛桃核、酸棗核許。
佢侇飼養馴化動物，主喫豬肉。還打野生動物，比方野豬、鹿，還有魚、蝦、蟹、殼許。動物個骨頭還好做成裝飾、生活用品搭工具。
物
良渚文化芸集百工。手工匠人在產業化個作坊裏頭做玉器、石器、骨器、漆木器、陶器，佢侇有可能穿麻衣。
住
莫角山台地上有七座大型宮殿建築，木構件有十把米長，以榫卯結構支撐建築。牆體用毛竹骨，草泥迫牆，黃黏土打泥再搨牆，再用火烤讓佢堅固防潮。
行
良渚遺址城內有51條河，貴族出行會用獨木舟或者竹排。城市之間運物事也好用水道。
Remove ads
地理範圍
良渚文化以環太湖地區為中心，政治影響力北越揚子江，盛極進淮北，西到茅山搭天目山，東瀕東海。在前期，良渚王城是佢核心，後髖，權力中心有向太湖背面寺墩遺址一帶遷移。[3]
消亡
距瑲4000年光景，良渚文化消亡，佢個繼承者馬橋文化搭佢相比，有明顯弗同。馬橋文化幫良渚文化相比，出現經濟、技術個倒退，回到分散個部落社會狀態。佢個消亡原因畀弗同學者認為可能搭洪水，社會衝突或者瘟疫有關。卻情，遺傳學研究證明馬橋文化住民個基因繼承性，講明政治結構解體無導致人口個大規模替換。
也有學者認為，距瑲4200年光景，部分南下粵北，融入石峽文化，主體渡江北上，融入華夏文化。[3]
良渚文化遺址
良渚文化遺址眾多，範圍廣扗猛，包括良渚王城遺址、反山遺址、玉架山遺址、茅山遺址、新地裏遺址搭各許。
參考資料
延伸閱讀
外部連結
Wikiwand - on
Seamless Wikipedia browsing. On steroids.
Remove ads