1981年3月初，上海市向时任中华人民共和国国务院副总理谷牧提出利用外资创建出口产品工业区个想法，谷牧表示支持。上海市规划局故咾提出奉贤星火农场、闵行两隻选址方，阿末勒垃同年4月6号，请示建立闵行出口产品工业区；7月3号，上海市人民政府批复同意；1982年8月21号，上海市规划局向市人民政府上报《闵行昆阳工业点开发规划方案》，规划建设闵行新工业区，东起沙港，西到昆阳路，北沿剑川路，南到江川路，规划面积2.13平方公里。1983年，上海市开发公司管理处委托上海工业设计院编制详细规划，拿昆阳工业点改叫闵行开发区，拿昆阳路以东个高压供电走廊用地划畀闵行开发区。^[3]

1983年4月3号，时任上海市副市长裴先白主持召开闵行开发区征地动迁工作会议，成立闵行开发区征地动迁领导小组。1983年6月2号，上海市人民政府决定拿虹桥开发区、闵行开发区个开发机构合并，正式成立上海市闵行虹桥开发公司；同隻号头，公司头一趟邀请200多名外国商人进行招商引资。1984年5月份，沪港合资上海环球玩具有限公司勒垃开发区成立，是第一家进驻开发区个企业。1985年2月份，经上海市人民政府、对外经济贸易部批准，成立开发企业上海闵行联合发展有限公司，是一家内地搭香港合资个公司，全权负责闵行开发区个发展。^[4]

1986年，中华人民共和国国务院正式批准成立国家级闵行经济技术开发区，约定建设资金上海市自家寻，借用外资上海市自家还。

1991年8月份，上海市人民政府上报国务院特区办公室、国家计委、海关总署批准，闵行开发区用地面积扩大到3.5平方公里。第二期扩大工程分两块：南块从江川路往南扩展到黄浦江边；西块东起昆阳路，西到碧溪路，北沿咾大中华橡胶厂闵行分厂，南到上海重型机器厂。^[5]

2014年，上海闵行联合发展有限公司帮上海虹桥经济技术开发区联合发展有限公司（虹桥开发区开发实体）进行资产重组，成立上级控股公司上海地产闵虹（集团）有限公司^[6]。