江川路

江川路是中華人民共和國上海市閔行區南部一條路。伊東起滬閔路接江川東路，西到西河涇東岸，用雲南江川做名字^[1]。1958年修個，伊個辰光叫一號路，全長7千米，1980年改名江川路^[2]。路邊是閔行經濟技術開發區。

歷史

1957年12月份，上海市一屆二次黨代會正式提出「在上海周圍建立衛星城鎮，分散一部分工業企業、減少市區人口過分集中」，規劃建設閔行、嘉定、安亭、松江、吳涇五隻衛星城^[3]，當中「閔行」就是老閔行，乃朝個江川路街道。1958年底，閔行衛星城裏向有得上海電機廠、上海重型機器廠、上海汽輪機廠、上海鍋爐廠咾啥個，8萬多人住勒閔行老鎮裏向。為咾緩解住房壓力，政府規劃出「閔行一條街」^[4]。

1959年4月3號，「閔行一條街」（乃朝江川路個滬閔路到蘭坪路段）開工。為咾迎接建國十周年，寬44米個路，連同路兩邊37幢四五層樓高個房子，只用六隻號頭就完工哉^[5]。伊辰光個「閔行一條街」生活設施齊全，有閔行鞋帽商店、迎賓茶葉店、大慶食品店、光明食品店、聚商老正興餐館咾啥個，劉少奇叫伊「閔行的南京路」^[6]。

1960年初，蘭坪路東西兩邊造仔16幢房子搭商業樓。1961年7月份，路往西拓展到瑞麗路。

江川路一開始造好個辰光，路兩邊種個是白楊樹，冬天落葉，夏天生蟲。1961年改成常青個香樟木。