雅爾塔會議

雅尔塔会议（英语：Yalta Conference；俄语：ялтинская конференция），也叫克里米亚会议，是美国、英国搭苏联三国领导人——美国总统富兰克林·德拉诺·罗斯福、英国首相温斯顿·丘吉尔搭苏联人民委员会主席斯大林勒1945年2月4号到2月11号个辰光，勒苏联克里米亚雅尔塔里瓦几亚宫里向开个一趟关键性首脑会议。该趟会议，制定仔战后世界新秩序搭列强利益分配方针，形成仔“雅尔塔体系”，对第二次世界大战过后个世界局势有交关深个影响。

雅尔塔会议个三巨头：丘吉尔、罗斯福搭斯大林

该趟会议是勒1943年德黑兰会议过后，第二趟同盟国首脑会议，俚个结论勒1945年7到8月个波茨坦会议就有争议。交关多个人批评该趟会议，让苏联搭各国共产党好控制中欧、东欧搭亚洲交关国家，主要是会当中罗斯福搭丘吉尔侪朆尊重打仗辰光畀占领国家个巴望，拿畀苏联“解放”个国家先交畀联合国代管。还有，为仔争取苏联朝日本宣战，会当中有点内容侵犯中国权益穷大。会之前其他国家弗晓得，所以也有“雅尔塔密约”个讲法。