Lsjbot

Lsjbot是一個勒拉維基百科浪自動創建個程序或者網絡機器人。伊個開發者是瑞典語維基百科個維基人斯韋克·約翰松。伊創造仔瑞典語維基百科、宿霧語維基百科搭仔瓦瑞語維基百科浪絕大多數個條目^[1] 。

Lsjbot創建個其中一條條目

歷史

Lsjbot個開發者斯韋克·約翰松

2012年1月30號，Lsjbot畀創建出來。截至2014年7月，該機器人已勒拉維基百科浪創建270萬篇條目，平均每天好創建約碼1萬篇條目，占條目總數個8.5%^[2][3]，當中三分之一是勒拉瑞典語維基百科，三分之二是勒拉宿霧語維基百科同瓦瑞語維基百科浪（宿霧語是創辦人約翰松妻子個母語）。截至2019年，該機器人已經累計創建950萬篇條目，平均每天好創建約碼4千篇條目^[4]。

2014年7月份，華爾街日報發文介紹箇只機器人，引起國際性關注^[2]。悉尼先驅晨報拿伊同人類歷史浪出版書籍最多個作家菲爾·帕克（英語：Phil Parker (author)）擺拉一道，帕克出版多達8.5萬本個書，儕是用計算機寫出來個^[3]。還有媒體拿伊個開發同美聯社宣布準備用機器人寫報道箇樁事體聯繫拉一道^[5]。

2013年6月15號，勒拉Lsjbot個幫助下頭，瑞典語維基百科個條目數達到100萬，變成功第8隻達到箇個目標個維基百科言語版本，甚至第100萬個條目就是Lsjbot創建個。箇個辰光，伊已經勒拉瑞典語維基百科創建約碼45.4萬個條目，條目總數近一半是伊寫個^[6]。

對箇種機器人創建個小作品，有人認為邪氣有意思，有人認為缺少有實際意義個內容^[7]。早勒拉2017年，瑞典語維基百科便開始刪脫Lsjbot寫個部分嘸沒足夠信息個條目。

工作範圍

按照伊勒拉瑞典語維基百科浪個用戶頁^[1]，箇個機器人主要勒拉創建世界浪所有生物物種個條目。目前伊已經創建仔所有鳥類同昆蟲個條目。伊個長期目標之一是創建上百萬個維基百科嘸沒記載過個物種條目。

Lsjbot個另外一項工作是勒拉瑞典語維基百科浪創建同菲律賓有關係個條目。伊好利用塔加洛語維基百科里向相關條目個信息來創建菲律賓鄉村相關個小作品條目。伊亦勒拉宿務語維基百科同瓦瑞語維基百科創建箇兩種言語版本裡向絕大多數個條目^[1]。