海宝

海宝（英语：Haibao），意思是“四海之寶”，是中国2010年上海世界博览会隻吉祥物。“海宝”是勒垃巫永坚拿汉字演变成吉祥物隻创意个基础丄，邵隆图“人”个核心理念底下，上海姑娘方芳进行造型设计个。2007年12月18号正式对外公布。^[1]

上海中华艺术宫站里向个海宝纪念台，展示弗同改款个海宝

形象

篆書 「人」

海宝个主体形象赛过隻汉字“人”，表示人是城市个核心。^[2]海宝身体弗同部位也有得弗同设计理念：^[3]

部位	特征
头发	赛过翻卷个海浪，表明海宝从海来个
脸部	卡通化个面孔表现友好自信
眼睛	大咾圆，表明对未来个期待
蓝色	象征包容搭仔想象力
身体	圆润可爱
拳头	翘起隻大节头表明欢迎来宾
大脚	是支撑，表明办好世博会个信心

名字来源

上海世博会吉祥物征集办公室主任刘军曾透过口风，表示勒垃敲定用“海宝”箇名字前，团队亨巴冷打取仔200多隻名字，比方讲“海朋”、“海海”咾啥个，阿末确定用“海宝”箇名字^[4]，因为“海宝”意思是“四海之宝”，读起来琅琅上口，搭伊身浪向隻颜色差大弗多。^[5]

征集过程

上海世博会事务协调局成立个上海世博会吉祥物征集办公室勒垃2007年1月17号开始向全世界征集吉祥物个设计。到5月31号，收到21隻国家个26655件作品。头一轮拿作品筛选到2000件仔么，征集办公室请仔11名终审评委评价作品，评委有得中国美术家协会主席靳尚谊、上海大学美术学院院长邱瑞敏、台湾温画家许培育、文化学者余秋雨咾啥个。^[6]阿末敲定台湾设计师巫永坚为主个团队原创设计、邵隆图领衔个修改团队修改个“人”形海宝方案。

2007年9月24号，上海世博会第五次组委会会议敲定箇隻方案。^[7]同年12月18号，中国2010年上海世博会组委会第一副主任委员、上海市长韩正勒垃“吉祥中国——2010年上海世博会吉祥物揭晓晚会”丄揭晓吉祥物海宝。^[8]

流行文化

勒垃2010年上海世博会举办前，有得专门个动画片《海宝来了》系列动画片。^[9]

勒垃21世纪20年代，有人勒垃中文互联网丄拿海宝个表情配上上海闲话做成表情包，勒垃中文互联网有过热度。^[10]