马哈蒂尔·穆罕默德

马哈蒂尔·穆罕默德（马来语：Tun Dr. Mahathir bin Mohamad；1925年7月10号生），是马来西亚第四任（1981年-2003年）搭第七任（2018年-2020年）总理，同时也是一名作家搭医生，尊称“马来西亚现代化之父”，生勒吉打州亚罗士打。渠头一趟任职总理个辰光从1981年做到2003年，长达22年107天，是马来西亚任期顶长个总理。1946年，伊加入巫统。^[1]1976年，伊出任巫统署理主席搭副总理。1981年继任巫统主席搭总理。2016年，马哈蒂尔宣布退出巫统^[2]，成立土著团结党^[3]。2018年，伊代表土著团结党当选，接任第七任总理搭浮罗交怡个国会议员^[4]，2020年下台仔么畀土著团结党最高理事会开除党籍^[5]，自家成立祖国斗士党^[6]，提出七项改革议程，让国家再成为“亚洲之虎”^[7]。

伊新加坡国立大学毕业，是逊尼派穆斯林。伊个老婆是茜蒂哈斯玛。渠个儿子慕克里兹·马哈蒂尔是吉打州第11任、第13任州务大臣。

1925年7月10号生勒吉打州亚罗士打^[8]。伊拉爷是苏丹阿卜杜勒哈密德学院（Sultan Abdul Hamid College）个校长。伊勒英文浪向邪气出色，别个科目也侪来得格好。因为成绩优秀，1933年，伊拨录取到苏丹阿卜杜勒哈密德学院去读书^[9]。

第二次世界大战打好啊，马哈蒂尔中学毕业，成绩邪气推板。1947年，伊驮着奖学金，跑到新加坡个爱德华国王七世医学院（就是现在个新加坡国立大学）去学医^[10]。毕业之後，伊做仔医生，箇只生活过仔将近20年，再跑到政坛浪去活跃^[11]。

实际浪向，伊勒去读医学院之前，老早就勒碰政治哉。1946年，伊就加入仔（马来民族统一机构）（巫统），算得上是头一批党员^[12]。勒读书个辰光，伊拿笔名“CHE Det”写专栏^[13]。等到1959年马来亚大选个辰光，伊已经坐稳仔巫统吉打州主席个位子哉^[14]。

马哈蒂尔头一趟勒选举里向赢，是勒1964年全国大选，箇年伊39岁，当选仔吉打州哥打士打南区个国会议员^[15]。弗想过仔5年，到1969年全国大选，伊朆保住自家个位子，落选脱哉。随後勒513事件裏向，伊因为公开批评政府，拨巫统开除脱党籍^[16]^[17]。

勒朆做官个几年里，马哈蒂尔写出仔伊个头一本书，叫《马来人个困境》，裏向讲要优待马来人。箇种想法拨1970年上台个总理敦阿卜杜勒·拉扎克看中，觉着蛮好，马哈蒂尔也就勒1972年重新回到巫统^[15]。

一回去，伊就变成功一颗政治新星，蹿起来邪气快。1973年，伊就拨委任做上议员^[18]。到1974年全国大选，伊当选吉打州古邦巴素个国会议员^[19]。再过两年，到1976年，伊就升上去做仔副总理^[12]。一直到1981年7月16号，马哈迪正式做总理，箇只位子一坐就是22年^[20]，坐到2003年10月31号，再交拨当时个副总理阿卜杜拉·巴达维^[21]。

勒伊做总理个辰光，马哈蒂尔拿国家个经济搞得更现代化，还起造仔交关地标性个大工程。顶有名个就是勒吉隆坡造个国油双峰塔，有一段时间是全世界顶高个大楼。还有宝腾国产车、新个行政首都布城、槟城大桥咾啥，侪是伊勒任期内搞起来个交关厉害个项目。马来西亚勒伊个领导底下，连得网络空间搭外层空间箇种新物事也侪变成现实哉。大家朆想着，原本静静叫个雪邦农业区，後首底会得变成功世界顶好个机场之一，还有个一级方程式赛车场。伊勒任内还推行仔第五、第六、第七搭第八个大马计划，轻快铁个出现，也拿城市交通个面貌彻底改变脱哉。勒伊做总理个将近十年里向，国家经济个增长速度邪气惊人，每年差弗多要增长9%。另外，勒推行仔20年个新经济政策快要结束个辰光，马哈蒂尔勒1990年又提出仔新个发展目标——“2020年宏愿”^[22]。

2003年退位之後，马哈迪仍旧担任宝腾搭国油（Petronas）个顾问，外加还一直做到首要领导基金会个名誉主席，做到今朝^[23]。

2015年之後，马哈迪个政治活动重新活络起来。主要原因是一個馬來西亞發展有限公司醜聞（1MDB）爆出来，伊对当时个总理纳吉·阿都拉萨个做法邪气弗满意，觉着箇桩事体伤仔国家个筋骨。2016年，伊正式退出仔执政党巫统^[24]，还牵头成立仔一隻新个政党，叫土著团结党^[25]。明确要拿纳吉个政府换脱^[26]。

2018年，伊带领反对党联盟希望联盟勒大选里向赢仔，自家以92岁个高龄重新做总理，创下世界纪录^[27]。上任之後，伊拉政府重新启动对一马公司案件个调查，并推动相关个司法程序。

2020年，因为联盟内部分裂，伊勒政治危机里向辞脱仔总理职务。後首底，伊搭土著团结党个关系恶化脱，最终自家又成立仔一隻新个政党，叫祖国斗士党。

马哈蒂尔·穆罕默德

生平

荣誉

参考

外部链进来

Wikiwand - on