ჩინეთი

ჩინეთი,^{[კომ. 2]} ოფიციალურო ჩინეთიშ ოკათე რესპუბლიკა (PRC),^{[კომ. 3]} — სახენწჷფო ბჟაეიოლი აზიას. მოსოფელიშ მაჟირა არძაშე ანდაკათამი ქიანა რე ინდოეთიშ უკული 1.4 მილიარდშე უმოსი მახორუთ, ნამუშით მოსოფელიშ მახორობაშ 17.4%-ის აკმადგინანს. ჩინეთი იკათუანს ხუთი ბორჯიშ ორტყაფუს დო 14 ქიანა უხურგანს ოსქირონეთ.^{[კომ. 4]} 9,596,961 კმ² ფართობიშ მეჯინათ მოსოფელს რე მასუმა უკაბეტაში ქიანა. სახენწჷფო 33 პროვინციაშ დონეთ რე დორთილია: 22 პროვინცია,^{[კომ. 5]} 5 ავტონომიური რეგიონი, 4 მუნიციპალიტეტი დო 2 გვერდო ავტონომიური სპეციალური ადმინისტრაციული რეგიონი. ქიანაშ ნანანოღა რე ბეიჯინგი, თეწკჷმა შანხაი რე არძაშე დოხორელი ნოღა ურბანული ტერიტორიაშ მეჯინათ დო უკაბეტაში ფინანსური ცენტრი. ქიანას ბჟაეიოლშე ომძღჷ ჸვინთელი, ბჟაეიოლი ჩინეთიშ დო ობჟთე ჩინეთიშ ზუღეფი (რჩქალი ოკიანე). წყარპიჯწკჷმა ანდა კოკი რე, ნამუეფშე უდიდაში რე ტაივანი დო ჰაინანი. ოორუეშე უხურგანს — მონღოლეთი დო რუსეთი, ბჟადალშე — ყაზახეთი, ყირგიზეთი, ტაჯიკეთი, ავღანეთი; ობჟათეშე — ნეპალი, ინდოეთი, ბჰუტანი, მიანმარი, ლაოსი, ვიეტნამი; ოორუეშე — ოორუე კორეა. ოფიციალური ნინა — ჩინური. ერუანული დღახუ რე 1 გჷმათუთა — რესპუბლიკაშ გჷმოცხადაფაშ დღა (1949). ოფიციალური კალენდარი — გრიგორიანული რე, თაშნეშე გჷმირინუანა თუთაშ დო ბჟაშ კალენდარს. ფარაშ ართული რე იუანი.

ჩინეთიშ ოკათე რესპუბლიკა 中华人民共和国 ჩინეთი
ჰიმნი:  《义勇军进行曲》 მოხახალეეფიშ მარში
ჩინეთიშ ორენი
ნანანოღა		ბეიჯინგი 39.916667,116.38333339°55′ ოორ. გ. 116°23′ ელ. გ.
უკაბეტაში ნოღა		შანხაი[1][2]
ოფიციალური ნინა(ეფი)		ჩინური1
რელიგია		33.4% ბუდიზმი 25.2% ვა რელიგიური 19.6% დაოსიზმი 17.7% შხვა ოკათე რწუმეფი 2.5% ქირსიანობა 1.6% ისლამი
თარობა		უნიტარული მარქსისტულ-ლენინისტური ართპარტიული სოციალისტური რესპუბლიკა[3][4]
-	ჩკპ-შ გენერალური მელამოსე დო პრეზიდენტი	სი ძინპინი
-	პრემიერი	ლი ციანი
ფართობი
-	გვალო	9 596 960 კმ2 (მა-3)
-	წყარი (%)	2.8
მახორობა
-	2024 ფასებათ	1,408,280,000[კომ. 1][5] (2-ა)
-	მეჭედალა	147 ად/კმ2 (83-ა)
ედპ (ჸუპ)		2025 ფასებათ
-	გვალო	$39.438 ტრილიონი[6] (1-ლი)
-	ართ მახორუშე	$28,008 (73-ა)
აგი (2022)		35.7 (ოშქაშე) (75-ა)
ვალუტა		იუანი3 (CNY)
ბორჯიშ ორტყაფუ		(UTC +8სთ.)
ქიანაშ კოდი		CH
Internet TLD		.cn, .hk, .mo
ოტელეფონე კოდი		+86
1თაშნეშე ინგლისური ჰონგ-კონგის, პორტუგალიური მაკაოს. 2ფართობი ტაივანიშ, ჰონგ-კონგიშ დო მაკაოშ მოხ. 3თაშნეშე ჰონგ-კონგური დოლარი ჰონგ-კონგის, პატაკა მაკაოს.

ჩინეთი იკოროცხუ ცივილიზაციაშ ამშვი ონწეს შქას ართ-ართო. თე რეგიონს ადამიერიშ პირველი ხორუაქ პალეოლითიშ ეპოქას გორჩქინდჷ. ჯვ.წ. მაჟირა ვითოშწანურაშ ბოლოშო ჸვინთელი წყარმალუშ გიყორს გორჩქინდჷ უჯვეშაში დინასტიური სახენწჷფოეფქ. ჯვ.წ. VIII–III ოშწანურეფს დიჭყჷ ჭოუშ დინასტიაშ ხემანჭუაფაშ დაღამაკებაქ, ნამუსჷთ წორო გეჸუნდუ ადმინისტრაციული დო ოურდუმე ტექნიკაშ, ლიტერატურაშ, ფილოსოფიაშ დო ისტორიოგრაფიაშ წუმოძინა.

ჯვ.წ. 221 წანას, ჩინეთიქ აკიკათჷ იმპერატორიშ გამაგალაშ გიმე, ნამუქჷთ ჟირი ვითოშწანურაშ განწეობას რინელი იმპერიული დინასტიეფშო ოსხირო გჷნირთუ, მუჭომით რდეს: ცინიშ, ჰანიშ, ტანიშ, იუანიშ დო მინიშ დინასტიეფი, თაშნეშე ცინიშ იმპერია. ფინდიხიშ დო ქარღადიშ გჷმოგონებაქ, აბრეშუმიშ რზაშ გიჭყაფაქ დო კაბეტი კიდალაშ აკოგაფაქ ხე ქეშუნწყჷ ჩინური კულტურაშ გოპეულუას, ნამუქჷთ შანულამი გაულათ იღვენუ მუჭოთ მეძობელ ქიანეფშა, თეშ შორიშ დიხეფშა.

მარა, XIX ოშწანურაშ დალიას, ჩინეთიქ ქიდიჭყჷ ქიანაშ შხვადოშხვა ნორთის გინოჩამა ევროპული სახენწჷფოეფშა უწორწე ხეკულუეფიშ რზათ.

ქიანაშ ჯოხოდვალა

• მარგალურო: ჩინეთიშ ოკათე რესპუბლიკა
• ოდაბადური: Zhonghua Renmin Gongheguo

კომენტარეფი

1. ჰონგ-კონგიშ, მაკაოშ, ტაივანიშ მახორუეფიშ დო თი შხვაში თურეფიშ მოხ, ნამუეფჷთ ოხორანა 31 პროვინციას, ავტონომიურ რეგიონეფს დო მუნიციპალიტეტეფსჷნ.
2. ჩინ. 中国
3. ჩინ. 中华人民共和国
4. პაკისტანწკჷმა ჩინეთიშ ხურგი იდებუაფუ ინდოეთიშით, ნამუთ ედომუშამი ქაშმირიშ რეგიონს მუში ტერიტორიათ მითმირჩქინანს. ჩინეთის რუსეთწკჷმა ართო არძაშე უმოსი ოსქირონე ხურგი უღჷ.
5. ოდებელი ტაივანიშ პროვინციაშ მოხ.