არქეოლოგია
From Wikipedia, the free encyclopedia
არქეოლოგია[1] – (არქეო – /ბერძ. ἀρχαῖος - ჯვეში/, რთული ზიტყვაშ აკმადგინალი ნორთი, მიოწურუნას თიში აკმადგინე ზიტყვეფიშ რსხუს სიჯვეშაწკჷმა. სამანგ., არქეოგრაფია, არქეოლოგია, არქეოპტერიქსი) – მენცარობა, ნამუთ კოჩობურობაშ ისტორიულ ულირს გურაფულენს ნიფთიერი კულტურაშ ძეგლეფიშ, არტეფაქტეფიშ არქიტექტურული ძეგლეფიშ დო ბიოფაქტეფიშ მეჯინათ.
არქეოლოგიური ძეგლეფი აკა წყუ რე ადამიერეფიშ ჯარალუაშ გოვითარაფაშ ისტორიაშ უდიდაშ ნორთიშ დაგურაფალო. არქეოლოგიას დიდი შანულობა უღუ ჭარალუანი ეპოქეფიშ ისტორიულო დაგურაფალო. არქეოლოგიური რკუალაშ შედეგეფი გჷთმაფშანს დო აზუსტენს ნაჭარა წყუეფიშ ჩინებეფს. არქეოლოგეფიშ მინაგორა რე კინე ჭარალუაშ უჯვეშაში ძეგლეფით.
ნიფთიერი ძეგლეფიშ მაპალაფარო იმანჯებუ არქეოლოგიური გოთხორუეფი, ნამუეფსთ რჩქვაელობურო წჷმი უწორუანს არქეოლოგიური დოზვერუვა. გჷნათხორა მასალაშ დოგურაფაშ ბორჯის არქეოლოგია გჷთმიაპონუ ნიფთიერი ძეგლეფიშ ხანიშ გოთანჯუაშ დო კლასიფიკაციაშ დორხველურ მეთოდეფს (ქძ. გიმე არქეოლოგიური დათარიღაფა). თეშნერ დოგურაფაშ უკული არქეოლოგიური ძეგლი ისტორიულ წყუთ გჷნმირთუ. არქეოლოგია ნიფთიერი წყუეფიშ მუნაჩემეფიშ ოსხირშა ორთუ ჯვეშ ჯარალუეფიშ კულტურულ დო სოციალურ–ეკონომიკური დგომარობაშ რეკონსტრუქციას. თიშენ ნამჷ-და, ადამიერეფიშ ჯარალუაშ ისტორიული გოვითარაფაშ ირ ეშალს ნიფთიერი კულტურა დო ჸოფა კანონზჷმიერო რე მერსხილი სოციალურ–ეკონომიკურ რინაწკჷმა.