Kan-tāu

Kan-tāu (Hàn-jī: 干豆; Má-sài-gí: Kantaw; Hôa-gí: 關 (ㄍㄨㄢ)渡 (ㄉㄨˋ) ^Guāndù) sī Tâi-oân Tâi-pak-chhī Pak-tâu-khu ê chi̍t ê tē-hō-miâ, tú-hó tī Tām-chúi-hô kap Ke-lâng-hô ê kau-hōe-kháu. Chū kó͘-chá í-lâi, chiū sī tiōng-iàu ê tō͘-chiáu hioh-só͘; kéng-lāi mā ū Tâi-pak siāng tōa ê sip-tē, seng-thài hui-siông hong-hù.

Kan-tāu tē-tô͘

Koan-im-soaⁿ khòaⁿ Kan-tāu

Kan-tāu Kok-ka-kip Tiōng-iàu Sip-tē

1996 nî Kan-tāu Chū-jiân Kong-hn̂g tī chia sêng-li̍p. 2001 nî 12 goe̍h chhe-1 khí úi-thok Iá-chiáu Ha̍k-hōe keng-êng koán-lí, siú chhòng Tâi-oân seng-thài pó-io̍k-khu úi-thok bîn-kan siā-thoân keng-êng koán-lí ê tē-it lē.

Kan-tāu tē-hng ê biō-sī Kan-tāu-kiong sī Tâi-oân pak-pō͘ ū-miâ ê Má-chó͘-biō, hiuⁿ-hóe heng-ōng.

Tē-hō-miâ

"Kan-tāu" chit-lō miâ sī tùi Basay-gí "Kantaw" lâi ·ê , só͘-í chá-kî Hàn-jī im-e̍k ê sî, pêng-bô thóng-it ê siá-hoat, pau-koat 干答門 (Kan-tap-mn̂g) (Pî-hái Kì-iû), 干豆門 (Kan-tāu-mn̂g) (Hông-û Choân-lám-tô͘, 皇輿全覽圖), 干答 (Kan-tap), 干豆 (Kan-tāu), 關杜 (Koan-tō͘), 江頭 (Kang-thâu), 肩脰 (Keng-tāu), 乾竇 (Kan-tō͘) kap 關豆 (Koan-tāu) téng-téng. Ji̍t-pún Sî-tāi siá 關渡 (カンタウ), 江頭 (かうたう) khah chē; 江頭 (Kang-thâu) che mā sī thih-lō͘ Tām-chúi Sòaⁿ ê chhia-chām miâ.

Chiàn-āu Tiong-hoâ Bîn-kok Chèng-hú chha-put-to lóng thóng-it siá-chò "關渡 (Koan-tō͘)". Phì-lūn-kóng Tâi-pak Chia̍t-ūn Tām-chúi Sìn-gī Sòaⁿ ê Kan-tāu Chām Hôa-gí tio̍h sī siá-chò "關渡站 ^{Guāndù Zhàn}". Ah Tâi-gí it-ti̍t lóng sī kóng "Kan-tāu" (干豆), chia̍t-ūn kóng-pò mā sī án-ne kóng.