Kiat-an-hiong

Kiat-an-hiong (Amis-gí: Cikasuan; Kheh-gí Sì-koān-khiuⁿ: gidˋ onˊ hiongˊ, Hái-lio̍k-khiuⁿ: gid onˋ hiongˋ), chá-chêng hō-chò Chhit-kha-chhoan, sī Tâi-oân Hoa-liân-koān ê 1-ê hiong, kiat-an ê cho̍k-kûn í Hok-ló, Kheh-lâng, Amis-cho̍k khah chē.

Kiat-an-hiong 吉安鄉
—  Hiong  —
Kiat-an-hiong ê uī-tì Kiat-an-hiong
Keng-hūi-tō͘: 23°57′00″N 121°34′00″E
Kok-ka	Tiong-hôa-bîn-kok
Koān	Hoa-liân-koān
Bīn-chek
- Lóng-chóng	65.2582 km2
Koân-tō͘	110 m
Jîn-kháu (2025 nî 8 goe̍h)
- Lóng-chóng	83,232 lâng
- Bi̍t-tō͘	1,275.43 lâng/km2
- Hō͘-sò͘	35,077
Sî-khu	NST (UTC+8)
Iû-piān hō-bé	973
Bāng-chām	http://www.ji-an.gov.tw/

Le̍k-sú

Kiat-an goân-té sè-le̍k siōng-tōa ê sī Sakizaya-cho̍k, āu-lâi tī Chheng-léng Sî-tāi Sakizaya-cho̍k kah Kaliawan-lâng (hia ê Sakizaya-cho̍k kah Amis-cho̍k tùi Kebalan-cho̍k ê chheng-ho͘) in-ūi put-boán tiāⁿ-tiāⁿ hō͘ Hàn-jîn khi-hū, khòng-gī ê lâng koh hō͘ Chheng-kun thâi-liáu-liáu, sûi hoat-seng Kaliawan Chiàn-e̍k, Chheng-kun tú-khai-sí phah kah chiok chhi-chhám ê, āu-lâi tio̍h chio Amis-cho̍k lâi tàu phah, lo̍h-bóe goân-pún ê Sakizaya-cho̍k kah Kebalan-cho̍k kiōng-beh siau-bia̍t, Amis-cho̍k ê Chhit-kha-chhoan-siā tio̍h piàn-chò chia siōng tōa ê sè-le̍k. Chhit-kha-chhoan sī tùi Amis-gí "Cikasuan" hoan-e̍k--lâi--ê, ì-sù sī "chhâ-chháu (Cikasoyay) chiok chē ê só͘-chāi".

Ji̍t-pún Sî-tāi hoat-seng Chhit-kha-chhoan Sū-kiāⁿ liáu-āu, Chhit-kha-chhoan-siā hőng húi-bia̍t. 1910-nî, Tâi-oân Chóng-tok-hú kó͘-lē Ji̍t-pún-lâng î-bîn khì Hoa-liân, Tâi-tang, tio̍h tī goân-té ê Chhit-kha-chhoan-siā kiàn-li̍p "Kiat-iá-chhun". Chiàn-āu Tiong-hôa Bîn-kok chèng-hú siat Hoa-liân-koān Kiat-iá-hiong, tān-sī koh bô kah-ì "Kiat-iá" chit khoán ê Ji̍t-pún miâ, sûi tī 1948-nî kái 1-jī chò "Kiat-an-hiong".