Tâi-tang Iá-kiû Chhun

Tâi-tang Iá-kiû Chhun sī chi̍t-ê ūi tī Tâi-tang-koān Tâi-tang-chhī ê iá-kiû-tiûⁿ, lāi-té ū Tē-it Iá-kiû-tiûⁿ kah Tē-jī Iá-kiû-tiûⁿ. Kiû-tiûⁿ lī Tâi-tang chhī-khu chē-chhia chha-put-to 10-hun-cheng tio̍h ē-sái kàu, kàu Tâi-tang Chhia-thâu mā kan-na 500-kong-chhioh, hù-kīn ē-tàng thêng-chhia ê só͘-chāi mā chiok chē, kau-thong hui-siông hong-piān.

Tâi-tang Iá-kiû Chhun

Ki-pún chu-liāu
Ūi-tì	Tiong-hôa Bîn-kok Tâi-tang-koān Tâi-tang-chhī Heng-an-lō͘ 525-hō
Tāng-kang	1999 nî 5 goe̍h
Khé-iōng	2006 nî 5 goe̍h 28
Gia̍p-chú	Tâi-tang-koān chèng-hú
Êng-ūn tan-ūi	Tâi-tang-koān chèng-hú
Chháu-po͘-á piáu-chân	Thian-jiân chháu-po͘-á
Kiàn-tio̍k-hùi	Sin-tâi-phiò 3.8-ek kho͘
Iông-la̍p jîn-sò͘	6,500-lâng
Tiôⁿ-tē chhùn-chhioh	Tó-gōa-iá: 320 Eng-chhioh Tiong-gōa-iá: 400 Eng-chhioh Chiàⁿ-gōa-iá: 320 Eng-chhioh
Sú-iōng-chiá	Tâi-tang Khí-lē San-ô͘ Sêng-pāng-tūi

Le̍k-sú

Tâi-tang Iá-kiû Chhun lóng-chóng ū Tē-it Iá-kiû-tiûⁿ kah Tē-jī Iá-kiû-tiûⁿ nn̄g-ê iá-kiû tē-tiûⁿ, sī bo̍k-chiân Tâi-tang-koān siōng chèng-sek--ê iá-kiû-tiûⁿ; tī Tâi-tang Iá-kiû Chhun oân-kang khé-iōng chìn-chêng, Tâi-tang ê iá-kiû pí-sài lóng tī Keng-seng Pak Lō͘ ê Tâi-tang Koān-li̍p iá-kiû-tiûⁿ (taⁿ Tâi-tang Koān-li̍p Lúi-kiû-tiûⁿ) kí-hêng. 1994 nî Tâi-tang koān-tiúⁿ Tân Kiàn-liân goân-té beh khí Tâi-tang-koān Ūn-tōng Kong-hn̂g, tān-sī in-ūi Kàu-io̍k-pō͘ bô tông-ì, lo̍h-bóe kái khí Tâi-tang Iá-kiû Chhun. Tē-jī Iá-kiû-tiûⁿ tī 2000 nî 3 goe̍h tāng-kang, khai 1-ek 2-chheng-bān kho͘, tī 2001 nî 12 goe̍h 15 lo̍k-sêng khé-iōng. Tē-it Iá-kiû-tiûⁿ tī 2000 nî 11 goe̍h 24 tāng-kang, tī 2003 nî 7 goe̍h oân-kang liáu-āu, in-ūi giām-siu ê būn-tê bô-hoat-tō͘ má-siōng lo̍k-sêng khé-iōng, lo̍h-bóe tī 2006 nî 5 goe̍h 28 chèng-sek khé-iōng, pēng-chhiáⁿ tī hit-kang chìn-hêng Tiong-hôa Chit-pāng Sêng-thài COBRAS tùi-chiàn Hiaⁿ-tī Chhiūⁿ ê lē-hêng-sài, kui-ê Iá-kiû Chhun lóng-chóng khai Sin-tâi-phiò 3.8-ek kho͘.

Tâi-tang Iá-kiû Chhun tī 2018 nî 4 goe̍h oân-sêng àm-sî chiàu-bêng siat-pī, hō͘ Tâi-tang Tē-it Iá-kiû-tiûⁿ thang tī e-àm chìn-hêng pí-sài. 2018 nî Tang-hōaⁿ Liân-bêng U8 Iá-kiû Iau-chhiáⁿ-sài koan-kun-sài, Sin-pak-chhī Kok-pó Ka-siong tùi-chiàn Ko-hiông-chhī Ko-oán Kang-siong, chiâⁿ-chò ū àm-sî chiàu-bêng siat-pī liáu-āu ê thâu-chi̍t-tiûⁿ pí-sài, hō͘ Tâi-tang ê hiong-chhin thâu-chi̍t-pái tī e-àm kàu hiān-tiûⁿ khòaⁿ iá-kiû pí-sài^[1][2]. Lēng-gōa, Tâi-tang-koān chèng-hú mā hō͘ Tâi-tang Iá-kiû Chhun Tē-it Iá-kiû-tiûⁿ keng-sin kiû-tiûⁿ lāi-iá ê bāng-á, LED tiān-chú kè-hun-pán, kiû-tiûⁿ choán-pò-sek kah kiû-oân hiu-sek-sek téng-téng ê siat-si.

2022 nî 3 goe̍h 1hō, liân-bêng kong-pò͘ lē-hêng-sài sài-têng, an-pâi 5 goe̍h 24, 25 nn̄g-kang tī Tâi-tang Kiû-tiûⁿ chìn-hêng sài-sū, iû Lo̍k-thian Thô-oân tùi-chiàn chú-tiûⁿ ê Tiong-sìn Hiaⁿ-tī (āu-lâi 5/25 sài-têng in-ūi lo̍h-hō͘ iân-sài), mā-sī keh 14-tang liáu-āu koh-chi̍t-pái ū chit-pāng sài-sū ê an-pâi^[3].

Kiû-tiûⁿ Chu-sìn

• Chē-chí: Tâi-tang-koān Tâi-tang-chhī Heng-an-lō͘ 525-hō
• Koan-chiòng-se̍k sò͘-liōng: 6,500-se̍k
• Tó-gōa-iá: 320 Eng-chhioh
• Tiong-gōa-iá: 400 Eng-chhioh
• Chiàⁿ-gōa-iá: 320 Eng-chhioh
• Hù-kīn: Tâi-tang Chhia-thâu tē-tô͘

Tiōng-iàu Ji̍t-chí

• Tiong-hôa Chit-pāng thâu-chi̍t-chiàn: 2006 nî 5 goe̍h 28 (Sêng-thài COBRAS 4 : 1 Hiaⁿ-tī Chhiūⁿ)
• Bêng-seng-sài: bô
• Kùi-āu-sài: bô
• Tâi-oân Tōa-sài: bô
• Kok-chè pí-sài: bô

Kau-thong Chu-sìn

• Tâi-thih: Tâi-tang Chhia-thâu (Lâm-hôe-sòaⁿ, Tâi-tang-sòaⁿ）
• Kong-chhia: Tâi-tang chhī-khu kong-chhia Phó͘-iu-má Kheh-ūn Lio̍k-hái-khong Khoài-chia̍t Lō͘-sòaⁿ Iá-kiû-tiûⁿ Chām

Gōa-pō͘ Liân-kat

Tâi-oân Pāng-kiû Wiki-koán：Iá-kiû Chhun Tâi-tang Iá-kiû Chhun(Hàn-gí)

• Tiong-hôa Chit-pāng 大聯盟全球資訊網- Tâi-tang Koān-li̍p Iá-kiû-tiûⁿArchived 2019-12-26 at the Wayback Machine.