Lo̍k-thian Thô-oân

Lo̍k-thian Thô-oân (Hàn-jī: 樂天桃猿), koh hō-chò Rakuten Thô-oân, sī Tiong-hôa Chit-pāng ê chi̍t ki kiû-tūi, chiân-sin sī Lamigo Thô-oân, La New Hîm, Tē-it Kim-kong. 2006 nî La New Hîm tit-tio̍h tūi-sú thâu-chi̍t-ê koan-kun, āu--lâi ê Lamigo m̄-nā kái-piàn-liáu Tiong-hôa Chit-pāng ê ka-iû hong-sek, koh-tī 2014 nî kàu 2019 nî phah chhut "6 nî 5 koan", kî-tiong pau-hâm 2017 nî kàu 2019 nî ê saⁿ-liân-pà.

Lo̍k-thian Thô-oân Rakuten Monkeys
tóng-àn:Rakuten Monkeys logo.png Tūi-hui Bō-hui
Só͘-sio̍k liân-bêng	Tiong-hôa Chit-gia̍p Pāng-kiû Tāi Liân-bêng
Kiû-thoân hoat-jîn	Tâi-oân Lo̍k-thian Pāng-kiû-tūi Kó͘-hūn Iú-hān Kong-si
Sêng-li̍p sî-kan	2003 nî
Kiat-sok sî-kan
Le̍k-sú	Tē-it Kim-kong (2003 nî) La New Hîm (2004 nî – 2010 nî) Lamigo Thô-oân (2011 nî – 2019 nî) Lo̍k-thian Thô-oân (2020 nî –)
Só͘-chai-tē	Thô-hn̂g-chhī
Chú-tiôⁿ	Lo̍k-thian Thô-hn̂g Iá-kiû-tiûⁿ
Tūi-hùn	{{{motto}}}
Ióng-iú-chiá	Lo̍k-thian Tu-sek Hōe-siā
Léng-tūi	Chhoan-tiân Hí-chek (Kawada Yoshinori)[1]
Chóng-kàu-liān	Kó͘-kiú-pó Kiān-jī (Furukubo Kenji)[2]
Siōng-bóe chi̍t-ê léng-tūi	{{{last_leader}}}
Siōng-bóe chi̍t-ê chóng-kàu-liān	{{{last_manager}}}
Kùi-koan-kun	（14） 2006 siōng 2006 hā 2007 hā 2008 hā 2011 hā 2012 hā 2014 siōng 2015 siōng 2017 siōng 2017 hā 2018 siōng 2018 hā 2019 siōng 2022 siōng
Nî-tō͘ chóng-koan-kun	（7） 2006 2012 2014 2015 2017 2018 2019
Tāi-piáu-sek	o͘-tò͘-âng
Koaⁿ-hong bāng-chí	monkeys.rakuten.com.tw

Le̍k-sú

Tē-it Kim-kong (2003 nî)

2003 nî, Tâi-oân Tāi-liân-bêng kah Tiong-hôa Chit-gia̍p Pāng-kiû Liân-bêng ha̍p-pèng, Tâi-oân Tāi-liân-bêng ê Tâi-pak Thài-iông kah Ko-pîn Lûi-kong ha̍p-pèng chò Thài-iông-tūi, koh kah Tâi-tiong Kim-kong hām Ka-lâm Ióng-sū ha̍p-pèng ê Kim-kong-tūi kau-ōaⁿ tūi-miâ, chiâⁿ-chò Tē-it Kim-kong. Tē-it Kim-kong thâu-chi̍t-nî chiàn-chek chiâⁿ bô-lí-sióng, kui-kùi 20-sèng 71-pāi 9-hô, .220 ê sèng-lu̍t mā sī Tiong-chit le̍k-sú lāi-té siōng kē ê kì-lo̍k. Kî-tiong bīn-tùi Hiaⁿ-tī Chhiūⁿ 20-tiûⁿ lóng bô iâⁿ (2-hô 18-pāi), it-ti̍t kàu keh-nî 3 goe̍h 4 hō La New Hîm chiah kā chit-ê bô-bīn-chú ê kì-lo̍k kiat-sok tiāu.

Nî-bóe Tē-it Kim-khòng in-ūi hoat-lu̍t-siōng ê būn-tê, bô-hoat-tō͘ kè-sio̍k keng-êng kiû-tūi, lo̍h-bóe kā kiû-tūi bē hō͘ Siaⁿ-pó Kong-si kî-hā ê Ta̍t-sēng Kong-si, koh hō͘ La New chàn-chō͘ keng-êng, miâ kái-chò La New Hîm.

La New Hîm (2004 nî－2010 nî)

La New Hîm jīn-ióng Tōa-pi-ô͘ Iá-kiû-tiûⁿ, kā chú-tiûⁿ siat tī hia, sī Tiong-chit tē-2-ê ū ka-kī ê chú-tiûⁿ (thâu-chi̍t-ê sī Thóng-it Sai) kah jī-kun ê kiû-tūi, koh sī thâu-chi̍t-ê lo̍h-si̍t chú-tiûⁿ chè-tō͘ ê kiû-tūi. Tī kiû-thoân-sú thâu-chi̍t-chiàn, tio̍h beh tī chú-tiûⁿ tùi-chiàn kū-nî m̄-bat phah iâⁿ kòe ê Hiaⁿ-tī Chhiūⁿ, lo̍h-bóe sī Chhòa Hông-te̍k tī 10-kio̍k-hā kòng-chhut chài-kiàn hőng-bú-láng, hō͘ La New í 2:3 tó-iâⁿ.

2006 nî 6 goe̍h 27, in-ūi Thóng-it Sai su-hō͘ Tiong-sìn Keng, La New Hîm tit-tio̍h tūi-sú ê thâu-chi̍t-ê kùi-koan-kun; hā-pòaⁿ-kùi koh í 29-sèng 9-pāi 3-hô, sèng-lu̍t .763 ê sêng-chek phah-phòa Tiong-chit siōng chió tiûⁿ-chhù hong-ông ê kì-lo̍k, sī Tiong-chit tē-3-ê siōng hā pòaⁿ-kùi lóng tit-tio̍h koan-kun ê kiû-tūi (thâu nn̄g ê sī Hiaⁿ-tī Chhiūⁿ kah Thóng-it Sai). 10 goe̍h 25, La New Hîm 4-chiàn lóng iâⁿ phah-pāi Thóng-it Sai, tit-tio̍h 2006 nî ê Tiong-chit chóng-koan-kun, mā sī in tūi-sú ê thâu-chi̍t-ê chóng-koan-kun, tāi-piáu Tâi-oân chham-ka hit-nî ê A-chiu Chit-pāng Tōa-sài, lo̍h-bóe tī koan-kun-chiàn í 0:1 su hō͘ Ji̍t-chit ê Ji̍t-pún Há-muh Tàu-sū. 2007 nî La New koh-chi̍t-pái phah ji̍p-khì Tâi-oân Tōa-sài, kāng-khoán beh tùi-chiàn Thóng-it Sai. Tī 2007 nî Tâi-oân Tōa-sài, La New ta̍k-tiûⁿ lóng ū hőng-bú-láng, nn̄g-pêng lóng-chóng 22-ki hőng-bú-láng mā phah-phòa Tiong-chit ê kì-lo̍k. 2009 nî La New Hîm bô-hoat-tō͘ phah ji̍p-khì kùi-āu-sài, kiû-kùi kiat-sok liáu-āu Tiong-chit koh hoat-seng ké-kiû-àn, La New ū cha̍p-gōa-ê kiû-oân sia̍p-àn, pau-hâm Tiuⁿ Chì-ka, Chhòa Eng-hong, Khó͘ Bûn-hiông chòe-āu lóng hō͘ kiû-tūi sek-chhut.

Lamigo Thô-oân (2011 nî－2019 nî)

2011 nî in-ūi kiû-tūi poaⁿ-khì Thô-hn̂g^[3][4], tio̍h kái-miâ hō-chò Lamigo Thô-oân. Lamigo tī kái-miâ liáu-āu ê thâu-chi̍t-tang tio̍h í hā-pòaⁿ-kùi tē-1 kah choân-nî kiû-kùi tē-it, chìn-ji̍p Tâi-oân Tōa-sài, mā hō͘ Hiaⁿ-tī Chhiūⁿ tn̄g-chām liân-sòa 3-tang phah ji̍p-khì chóng-koan-kun-sài ê kì-lo̍k. Tān-sī lo̍h-bóe tī Tâi-oân Tōa-sài í 1-sèng 4-pāi su hō͘ Thóng-it 7-ELEVEn Sai. 2012 nî Lamigo koh-chi̍t-pái phah ji̍p-khì Tâi-oân Tōa-sài, tùi-chhiú kāng-khoán sī Thóng-it 7-ELEVEn Sai, lo̍h-bóe í 4-sèng 1-pāi ho̍k-siû sêng-kong, tit-tio̍h 2012 nî ê Tiong-hôa Chit-pāng chóng-koan-kun, tāi-piáu Tiong-hôa Chit-pāng chham-ka A-chiu Chit-pāng Tōa-sài, chòe-āu tī koan-kun-sài í 3:6 su hō͘ Tho̍k-māi kī-jîn, tit-tio̍h a-kun.

2013 nî, Lamigo chham-khó Hân-kok Chit-pāng thui-chhut "Oân hong ő͘-ián", tau̍h-tau̍h-á khai-sí iōng tiān-chú im-ga̍k chhú-tāi kó͘-chhoe, koh kā kui-nî 60-tiûⁿ chú-tiûⁿ lóng pâi tī Thô-hn̂g Kok-chè Iá-kiû-tiûⁿ, āu-lâi mā chiâⁿ-chò kî-tha kiû-tūi ha̍k-si̍p ê tùi-siōng. 2014 nî chham-khó Bí-kok Chit-pāng thui-chhut "Choân Oân chú-tiûⁿ", kā kheh-tūi ê ő͘-ián-khu sóa khì gōa-iá, lāi-iá m̄-koán it-lúi-chhek ah-sī saⁿ-lúi-chhek lóng chiâⁿ-chò chú-tūi ê ő͘-ián-khu, tī chú-tiûⁿ mā choân-pō͘ lóng iōng tiān-chú im-ga̍k. Chit-nî Lamigo mā sūn-lī ji̍p-khì kàu Tâi-oân Tōa-sài, pēng-chhiáⁿ í 4-sèng 1-pāi phah iâⁿ Tiong-sìn Hiaⁿ-tī, tit-tio̍h chóng-koan-kun. Tùi chit-nî khai-sí, Lamigo mā kah Ji̍t-pún Chit-pāng ê Chhian-ia̍p Lot-theh Hái-iûⁿ ha̍p-chok, kau-liû.

2015 nî Lamigo thui-chhut "Lamigo TV", sī Tiong-chit thâu-chi̍t-ê ū choan-bûn pîn-tō ê kiû-tūi. 6 goe̍h 13, in-ūi Gī-tāi Sai-gû í 2:11 su hō͘ Thóng-it 7-ELEVEn Sai, Lamigo chèng-sek hong-ông, tit-tio̍h tūi-sú tē-8-ê siōng-pòaⁿ-kùi koan-kun. Chit-nî sī kah Tiong-sìn Hiaⁿ-tī liân-sòa 2-tang tī Tâi-oân Tōa-sài tú-tio̍h, sui-jiân chêng-4-tiûⁿ phah liáu Lamigo í 1:3 lo̍k-hō͘ Tiong-sìn Hiaⁿ-tī, tān-sī lo̍h-bóe Lamigo phah chhut saⁿ-liân-sèng, Misch [en] koh tī tē-7-chiàn tâu chhut Tiong-hôa Chit-pāng Chóng-koan-kun-sài ê thâu-chi̍t-pái oân-tâu oân-hong bû-an-táⁿ pí-sài, í 0:11 phah-pāi Tiong-sìn Hiaⁿ-tī, tit-tio̍h chóng-koan-kun, mā ta̍t-sêng tūi-sú thâu-chi̍t-pái ê jī-liân-pà^[5].

2016 nî Lîm Tì-sèng choán-tūi khì Tiong-sìn Hiaⁿ-tī, Tân Kim-hong mā soan-pò͘ beh tī chit-nî ín-thè. Lo̍h-bóe Lamigo m̄-nā bô-hoat-tō͘ thiau-chiàn 3-liân-pà, koh tī 2015 nî kiû-kùi thiām-té, kī-lī téng-pái thiām-té í-keng ū 11-nî ah.

2018 nî 1 goe̍h, Tiong-hôa Bîn-kok Chóng-thóng Chhòa Eng-bûn chiap-kiàn Lamigo Thô-oân

2017 nî tùi 3 goe̍h 28 ê chú-tiûⁿ khai-bō͘-chiàn khai-sí it-ti̍t kàu 4 goe̍h 22, Lamigo tī chú-tiûⁿ phah chhut 10-liân-sèng, sī tūi-sú siōng hó ê kì-lo̍k. 6 goe̍h 25 phah-pāi Tiong-sìn Hiaⁿ-tī tit-tio̍h siōng-pòaⁿ-kùi koan-kun, koh tī 10 goe̍h 11 í 9:7 phah-pāi Thóng-it Sai, pau-pān siōng hā pòaⁿ-kùi koan-kun, choân-nî-tō͘ 78-sèng mā phah-phòa Tiong-hôa Chit-pāng ê kì-lo̍k. Lo̍h-bóe tī Tâi-oân Tōa-sài í 4-sèng 2-pāi phah iâⁿ thàu-kòe thiau-chiàn-sài chìn-kip ê Tiong-sìn Hiaⁿ-tī, tit-tio̍h 2017 nî ê nî-tō͘ chóng-koan-kun.

2019 nî 3 goe̍h, Tiong-hôa Bîn-kok Chóng-thóng Chhòa Eng-bûn chiap-kiàn Lamigo Thô-oân

2018 nî 4 goe̍h 8 hō kàu 21 hō, Lamigo phah chhut 9-liân-sèng, kah tūi-sú kì-lo̍k pêⁿ-chē^[6]. Tī 4 goe̍h kiat-sok ê sî, kan-na phah 26-tiûⁿ tio̍h tit-tio̍h 20-sèng phòa liân-bêng ê kì-lo̍k^[7]. 6 goe̍h 17, Lamigo tī chú-tiûⁿ phah-pāi Tiong-sìn Hiaⁿ-tī, tit-tio̍h siōng-pòaⁿ-kùi koan-kun, mā sī tūi-sú thâu-chi̍t-pái liân-sòa 3-ê kiû kùi lóng tit-tio̍h kùi-koan-kun^[8]. 10 goe̍h 5 hō, Lamigo phah-pāi Hù-pang Hān-chiòng tit-tio̍h hā-pòaⁿ-kùi koan-kun, liân-sòa 2-tang pau-pān siōng hā pòaⁿ-kùi koan-kun, tī Tâi-oân Tōa-sài tit-tio̍h 1-tiûⁿ ê pó-sàng-sèng. Lo̍h-bóe Lamigo í 4-sèng 2-pāi phah iâⁿ tùi thiau-chiàn-sài chìn-kip ê Thóng-it 7-ELEVEn Sai, oân-sêng jī-liân-pà.

2019 nî 6 goe̍h 25, Lamigo phah-pāi Thóng-it 7-ELEVEn Sai, ka-siōng Hù-pang Hān-chiòng kah Tiong-sìn Hiaⁿ-tī pêⁿ-chhiú, Lamigo tit-tio̍h siōng-pòaⁿ-kùi koan-kun, liân-sòa 5-ê pòaⁿ-kùi tit-tio̍h koan-kun mā-sī Tiong-chit ê sin-kì-lo̍k. 7 goe̍h 3 hō, Lamigo soan-pò͘ beh kā kiû-tūi bē-tiāu^[9][10][11], lo̍h-bóe tī 9 goe̍h 19 soan-pò͘ beh bē hō͘ Rakuten (Lo̍k-thian)^[12][13][14]. 10 goe̍h 17, Lamigo tī Tâi-oân Tōa-sài í 4-sèng 1-pāi phah-pāi Tiong-sìn Hiaⁿ-tī, Lamigo oân-sêng kiû-thoân-sú thâu-chi̍t-pái mā sī siōng-bóe chi̍t-pái saⁿ-liân-pà^[15]. 10 goe̍h 26, Lamigo Thô-oân kí-pān kò-pia̍t-sài, khip-ín móa-tiûⁿ ê 2-bān 0810-lâng ji̍p-tiûⁿ, lo̍h-bóe Lamigo Thô-oân í 3:1 phah iâⁿ La New Hîm ^[16]. 12 goe̍h 17, kiû-tūi soan-pò͘ kā miâ kái chò Lo̍k-thian Thô-oân^{[17][18][19][20]}.

Lo̍k-thian Thô-oân (2020 nî－)

Rakuten Lo̍k-thian Thô-oân Tūi-miâ Hoat-piáu-hōe (2019 nî)

2022 nî 7 goe̍h 10 hō, Lo̍k-thian tī Lo̍k-thian Thô-hn̂g Iá-kiû-tiûⁿ tùi-chiàn Bī-choân Liông, chòe-āu iâⁿ-kiû tit-tio̍h kiû-tūi bē-tiāu liáu-āu ê thâu-chi̍t-ê kùi-koàn-kun^[21], lo̍h-bóe mā í nî-tō͘ chiàn-chek tē-1 chìn-kip Tâi-oân Tōa-sài. Tān-sī lâi-kàu Tâi-oân Tōa-sài, Lo̍k-thian bīn-tùi tī thiau-chiàn-sài phah iâⁿ Bī-choân Liông chìn-kip ê Tiong-sìn Hiaⁿ-tī 4-chiàn lóng su^[22]. Keh-nî 10 goe̍h 22, Lo̍k-thian tī Lo̍k-thian Thô-hn̂g Iá-kiû-tiûⁿ í 9:11 phah iâⁿ Tiong-sìn Hiaⁿ-tī, khak-tēng í nî-tō͘ tē-3 chìn-ji̍p Kùi-āu Thiau-chiàn-sài^[23]. 10 goe̍h 30, Lo̍k-thian phah iâⁿ Thóng-it 7-ELEVEn Sai, 3-chiàn lóng iâⁿ chìn-kip Tâi-oân Tōa-sài^[24], tān-sī tī Tâi-oân Tōa-sài í 3-sèng 4-pāi su-hō͘ Bī-choân Liông, liân-sòa 2-tang tī Tâi-oân Tōa-sài sit-lī^[25].

2024 nî 9 goe̍h 29, in-ūi Tiong-sìn Hiaⁿ-tī hā-pòaⁿ-kùi hong-ông, Lo̍k-thian khak-tēng thang í nî-tō͘ tē-3-miâ chìn-ji̍p kùi-āu-sài, tān-sī tī thiau-chiàn-sài lāi-té í 1-sèng 3-pāi su hō͘ Thóng-it 7-ELEVEn Sai, kah chóng-koan-kun-sài bô-iân.