Takasio Masaki
From Wikipedia, the free encyclopedia
Remove ads
Ko-iâm Chiòng-sū (Ji̍t-pún-gí:
 | 這篇文章有漢字兮版本。 參考這篇文章兮漢字版本。 |
I tùi 2011 nî khai-sí bat tī Ji̍t-pún gia̍p-î iá-kiû, Ji̍t-pún to̍k-li̍p iá-kiû liân-bêng kah Ò-chiu Iá-kiû Liân-bêng. 2017 nî khai-sí kàu Tâi-oân hoat-tián, tī Chông-oa̍t Chún-eng (āu--lâi kái-miâ chò An-éng Sian-bu̍t, Choân-oa̍t Ūn-tōng), 2024 nî chham-ka Tiong-hôa Chit-pāng Soán-siù-hōe hō͘ Thóng-it 7-ELEVEn Sai tī tē-6-lûn kéng-tio̍h pēng-chhiáⁿ oân-sêng chhiam-iok, chiâⁿ-chò Tiong-chit kiû-oân.
Remove ads
Seng-gâi
Ko-iâm Chiòng-sū seⁿ tī Sîn-nāi-chhoan-koān Hêng-pin-chhī, ko-tiong pit-gia̍p liáu-āu tha̍k Sîn-nāi-chhoan Tāi-ha̍k, tāi-ha̍k kî-kan i bô ka-ji̍p iá-kiû-tūi, it-ti̍t kàu tāi-ha̍k sì-nî ê sî chiah ka-ji̍p Ji̍t-pún ê gia̍p-î kiû-tūi Hêng-pin Kim-káng Kū-lo̍k-pō͘, pēng-chhiáⁿ tī 2011 nî Choân-Ji̍t-pún Kū-lo̍k-pō͘ Soán-chhiú-khoân Tāi-hōe 8-kiông-sài tâu-chhut sài-sū thâu-chi̍t-pái ê bô-an-táⁿ, bô-sit-hun pí-sài[1]. Kâng-nî Ko-iâm Chiòng-sū tâu-ji̍p Iá-kiû Thiáu-chiàn Liân-bêng soán-siù, tī thâu-chi̍t-lún hō͘ Hù-san Lûi-chiáu kéng-tio̍h[2], 2012 nî kàu 2014 nî tī Hù-san Lûi-chiáu lóng-chóng 24-sèng 18-pāi[3]. 2014 nî-té, Ko-iâm Chiòng-sū ka-bêng Ò-chiu Iá-kiû Liân-bêng Brisbane Bandits[4], keh-nî tńg--khì Ji̍t-pún hāu-le̍k Iá-kiû Thiau-chiàn Liân-bêng ê Hu-khú-sí-mah Hi-bāng-tūi[3].
2016 nî-té i pò-miâ Tiong-hôa Chit-pāng chiàn-le̍k-gōa chhek-chhì-hōe[5][6], tān-sī tī chhek-chhì-hōe lāi-té bô hőng khòaⁿ-chiōⁿ-ba̍k, āu--lâi i tī 2017 nî ka-ji̍p Tâi-oân gia̍p-î kiû-tūi Chông-oa̍t Chún-eng, kâng-nî i tī 2017 nî Choân-kok Sêng-pāng Kap-cho͘ Chhun-kùi Liân-sài chú-tâu 47.2-kio̍k, í hông-gū-lu̍t 0.18 tit-tio̍h tâu-chhiú-chióng tē-saⁿ-miâ[7][8]. Āu--lâi mā bat tit-tio̍h 2017 nî Hia̍p-hōe-poe tâu-chhiú-chióng tē-4-miâ, koh í 7-sèng 1-pāi kah hông-gū-lu̍t 1.57 tit-tio̍h 2017 nî Pōng-hoan-be̍h Iá-kiû Liân-bêng sèng-tâu-ông, hông-gū-lu̍t-ông kah chòe-ka 9-jîn ê tâu-chhiú chióng-hāng[9][10]. 2019 nî, koh-chi̍t-pái í 3-sèng kah hông-gū-lu̍t 0.31, tit-tio̍h 2019 nî Choân-kok Sêng-pāng Kap-cho͘ Chhun-kùi Liân-sài tâu-chhiú-chióng, pēng-chhiáⁿ mā tit-tio̍h koan-kun[11][12]. 2020 nî, hőng soán-chò Hia̍p-hōe-poe MVP, mā pang-chō͘ kiû-tūi tit-tio̍h Hia̍p-hōe-poe tūi-sú thâu-chi̍t-ê koan-kun[13]. 2021 nî, í la̍k-tiôⁿ pí-sài, tâu 50-kio̍k, 36-pái sa̋n-sín, tit-tio̍h Chhun-kùi Liân-sài sa̋n-sín-ông[14].
2021 nî 12 goe̍h, Ko-iâm Chiòng-sū in-ūi tng-leh pān-lí ko-kip choan-gia̍p jîn-châi kui-hòa Tiong-hôa Bîn-kok kok-che̍k, hőng soán ji̍p--khì Tē-30-kài À-chiu Iá-kiû Kím-phiau-sài Tiong-hôa Tâi-pak Tāi-piáu-tūi ê 40-lâng chi̍p-hùn miâ-toaⁿ[15][16], āu--lâi in-ūi bô-hoat-tō͘ sêng-kong kui-hòa, só͘-í lo̍h-bóe bô-hoat-tō͘ ji̍p-khì chèng-sek miâ-toaⁿ lāi-té[17][18].
Tiong-hôa Chit-pāng liân-bêng 2021 nî-té ê léng-tūi hōe-gī siu-kái kui-tēng, cheng-ka gōa-che̍k kiû-oân soán-siù tiâu-khoán, chí-iàu tī Tâi-oân ê kok, ko-tiong tha̍k-chheh lóng-chóng chhiau-kòe 3-tang, ia̍h-sī tī tāi-ha̍k liân-sòa tha̍k chhiau-kòe 4-tang, ia̍h-sī tī Tâi-oân tòa chhiau-kòe 5-tang jî-chhiáⁿ tī gia̍p-î sêng-pāng kiû-tūi hāu-le̍k chhiau-kòe 3-tang ê gōa-che̍k kiû-oân tio̍h ē-tàng khòaⁿ-chò pún-thó͘ kiû-oân chham-ka soán-siù, hō͘ Ko-iâm Chiòng-sū m̄-bián pān kui-hòa tio̍h ē-sái chham-ka Tiong-chit soán-siù[19].
2022, 2023 nî Ko-iâm Chiòng-sū lóng pò-miâ chham-ka Tiong-hôa Chit-pāng Kùi-tiong Soán-siù-hōe, tān-sī lóng bô tit-tio̍h kiû-tūi chí-miâ, 2023 nî lo̍k-soán liáu-āu Ko-iâm Chiòng-sū bat kah Lo̍k-thian Thô-oân chhiam--loeh chū-chú pôe-hùn ha̍p-iok, tān-sī in-ūi i bô Tiong-hôa Bîn-kok kok-che̍k, bô ha̍p Tiong-chit kui-tēng, kan-na ē-tàng iōng soán-siù ka-bêng, bē-tàng iōng chū-chú pôe-hùn ê hong-sek ka-bêng, lo̍h-bóe kái-tû ha̍p-iok[20]。2024 nî 6 goe̍h Tiong-hôa Chit-pāng Soán-siù-hōe, Ko-iâm Chiòng-sū tit-tio̍h Thóng-it 7-ELEVEn Sai tī tē-la̍k-lûn chí-miâ, pēng-chhiáⁿ chhiam--loeh 2.5-nî ê ha̍p-iok, pó-chiong goe̍h-kip Sin-tâi-phiò 8.5-bān kho͘, chiâⁿ-chò thâu-chi̍t-ūi iōng soán-siù ê hong-sek ji̍p-khì Tiong-chit ê gōa-che̍k kiû-oân[21].
Remove ads
Chit-pāng Seng-gâi Sêng-chek
Chham-khó Chu-liāu
Chù-kha
Gōa-pō͘ Liân-kiat
Wikiwand - on
Seamless Wikipedia browsing. On steroids.
Remove ads