人工智能詞彙表
From Wikipedia, the free encyclopedia
以下係人工智能(AI)上常用嘅詞彙一覽。
人工智能,又有叫機械智能(machine intelligence),泛指由機械展示嘅智能,相對於人同第啲動物展示嘅自然智能,而喺科學上,「人工智能」一詞亦都俾人攞嚟指專門研究人工智能嘅認知科學同電腦科學交界領域[1]。人工智能呢個領域上嘅研究會關注嘅問題包括點樣教機械做推理、知識表示、計劃、學習、自然語言處理、感知以及郁同操控物體等嘅作業,而呢啲研究其中一個終極目標就係想創造出強人工智能(strong AI)-即係喺廿世紀嘅人類想像當中常見、能夠展現出同人無異嘅智能嘅 AI [1][2]。
到咗廿一世紀,人工智能經已係一個蓬勃嘅獨立科學領域,引起咗哲學、社科同科幻等領域嘅討論,而且仲有得按照所使用嘅技術或者想達到嘅目的分做多個唔同嘅子領域。人工智能嘅子領域好多時仲要專化到彼此之間溝通唔到-所以有大量嘅專業行話詞彙[3][4]。