強人工智能(英文:strong artificial intelligence),又叫普遍人工智能(general artificial intelligence),可以話係人工智能領域嘅終極目標:人工智能係專門研究點樣人工噉創造智能體嘅領域;強人工智能係指能夠展現出所有自然智能有嘅特性嘅人工智能,會完美噉通過圖靈測試,理論上係人工智能領域會想創造嘅嘢[1]。
到咗 2020 年,強人工智能仲係一個難以達到嘅構想:廿世紀嘅學界作出咗多次創造強人工智能嘅嘗試,但次次都衰收尾,遠遠噉低估咗呢個作業嘅難度,而到咗廿一世紀,一個典型嘅人工智能專家多數都會集中於解決一至兩個問題,而唔會大想頭到諗住創造出能夠好似人類噉普遍解決問題嘅人工智能程式[2][3]。雖然係噉,有好多人工智能專家都相信,呢啲淨係曉解決一至兩個問題嘅人工智能程式終有一日會俾人砌埋一齊,做一個強人工智能[4][5]。