腦
From Wikipedia, the free encyclopedia
維基百科嘅醫學類文章只係提供參考,並唔係醫療意見。 閣下如果有任何關於健康嘅問題,請諮詢專業醫護人員。 |
腦嘅複雜度同智能息息相關:人腦齋係塊大腦皮層(cerebral cortex;指腦最外面嗰浸)就經已有成 150 至 330 億粒互相緊密連繫嘅神經細胞(neuron)咁滯,無論神經細胞數量定神經細胞之間嘅連繫緊密度都係地球上嘅動物之冠[6]-相比之下,(例如)貓成個腦加埋都係得嗰 7 億幾粒神經細胞[7];人腦嘅高複雜度令人能夠做高階嘅思考等嘅認知功能,因而具有地球動物當中最高嘅智能[1][8]。
神經科學同心理學等嘅認知科學領域會對腦進行研究:廿一世紀初嘅認知科學一般同意心腦同一論(identity theory),主張腦就係心靈嘅所在,會當正腦係一部生物版嘅電腦噉-呢啲領域嘅科學家普遍認為,腦同數碼電腦一樣會由外界吸收資訊、儲起啲資訊同埋處理啲資訊,分別只不過係腦用神經電流機制表示同處理資訊,數碼電腦用嘅就係電子機制;基於呢個諗法而搞嘅認知科學研究喺廿世紀取得咗相當嘅成功,而且人工神經網絡等嘅諗頭仲啟發咗 AI 上嘅突破[2][9]。