芭蕾舞
From Wikipedia, the free encyclopedia
喺古典芭蕾舞當中,一齣芭蕾舞劇可以當成一件藝術品,包含咗排舞同音樂等嘅部份,唔同部份會由個舞團嘅唔同人員負責:排舞師會負責舖排一齣芭蕾舞劇嘅舞步同配樂,途中需要考慮呢啲元素點樣配合齣劇嘅故仔[3];個舞團嗰啲舞蹈員(男-danseur 或者 ballerino / 女-ballerina [註 1])就要負責企上舞台將嗰啲舞步跳出嚟,用自己嘅身手同魅力扣動觀眾嘅心弦[4][5]。
芭蕾舞嘅歷史相當悠久:芭蕾舞源自 15 世紀文藝復興時期嘅意大利,後嚟由法國同俄羅斯發揚光大,有埋一套獨有嘅專業詞彙[6][7];而且芭蕾舞打後仲因為多人學多人跳,令到啲技術發展到愈嚟愈多樣化[8],出咗多隻唔同嘅門派同變種[9]。到咗廿一世紀初,芭蕾舞經已成為咗一種國際性嘅演藝,世界各個國家同地區都有組芭蕾舞團表演同教授呢種藝術,並且將佢哋各自嘅本土文化融入佢哋嘅芭蕾舞入面,而粵港澳地區嘅香港芭蕾舞團同廣州芭蕾舞團都屬於遠東地區享負盛名嘅芭蕾舞團[10][11]。