事件驅動編程

事件驅動編程（英文：EDP）係一種編程範式，個程式嘅流動由事件（撳咗某個掣等）控制。一個用 EDP 寫嘅程式會有個主迴圈：當個程式處於主迴圈嗰陣，部電腦會進入「等事件發生」噉嘅狀態，而事件可以包括^[1]－

• 「用家撳咗滑鼠上面左掣」、
• 「用家撳咗鍵盤上面嘅 W 掣」或者
• 「用家撳咗鍵盤上面嘅 A 掣」

一個人攞住遊戲手掣撳；想像家陣教電腦「每當玩家撳咗 A 掣就做...」「每當玩家撳咗 B 掣就做...」等嘅碼。

... 呀噉。個程式會同每件事件指定一段特定嘅子程序，叫部電腦每當嗰件事件發生嗰時，就做掕住嗰件事件嘅程序；簡化講例如想像一個遊戲程式，教部電腦「一旦用家撳咗遊戲手掣上面嘅 B 掣（事件發生），就要玩家角色起跳（子程序）」、「一旦用家撳咗遊戲手掣上面嘅 A 掣（事件發生），就要玩家角色向前衝（子程序）」... 呀噉。

喺廿一世紀初，EDP 係圖像用家介面上嘅標準做法，而且喺遊戲編程上都成日用到。有好多程式語言都支援用家攞 EDP 寫程式，例子有 Java 程式語言噉。

基本諗頭

内文：事件 (運算)

睇埋：程式編寫範式、基於事件架構同輸入架生

EDP 嘅根基係事件嘅概念。電腦程式編寫上講嘅「事件」，係指由隻軟件留意到嘅一個行動或者一件事件，例如係「踎士左掣畀人撳咗」或者「鍵盤上邊個邊個掣畀人撳咗」... 呀噉。唔跟 EDP 嘅程式通常會係噉嘅^[2][3]:p.5：

• 開始 → 讀取 input → 運算 → 寫出 output → 結束

而跟 EDP 嘅程式望落會比較似以下噉嘅流程^[3][4]:p.1：

• 開始、
• 進入事件迴圈、
• If 冇事件發生，繼續處於事件迴圈；
• If 有事件發生（trigger），睇吓件事件係乜事，按事先講定嘅法則，決定要做乜（事件處理器）；例如想像一個遊戲程式－
  • 假想個程式設定咗「如果玩家撳咗 A 掣，玩家角色就起跳，然後程式返去事件迴圈」；
  • 假想個程式設定咗「如果玩家撳咗 esc，就結束程式」；

要圖像化嘅話，可以想像下圖：

實行

睇埋：子程序同手稿語言

用虛擬碼噉嘅形式表達嘅話，EDP 啲碼望落通常大致上會係噉嘅^[5]：

 OnKeyEnter("A")  # 如果用家撳咗鍵盤上面 "A" 掣嘅話...
 {
   ... # ... 就要做呢個 { } 入面嘅嘢。（睇埋子程序嘅概念）
 }
 
 OnKeyEnter("B")  # 如果用家撳咗鍵盤上面 "B" 掣嘅話...
 {
   ... # ... 就要做呢個 { } 入面嘅嘢。
 }
 
 OnKeyEnter("C")  # 如果用家撳咗鍵盤上面 "C" 掣嘅話...
 {
   ... # ... 就要做呢個 { } 入面嘅嘢。
 }

例子可以睇吓遊戲引擎 Unity 入面嘅 C♯ 手稿語言。

睇埋

• 圖像用家介面
• 物件導向編程
• 控制流程
• 例外處理
• 遊戲編程