Unity

Unity係一款由Unity Technologies研發嘅跨平台遊戲引擎，可以用嚟製作3D或者2D嘅電子遊戲，亦都可以製作實時渲染動畫、建築展示、互動體驗、教學軟件之類嘅內容。

Unity嘅編輯器支援Windows同MacOS，而用Unity製作出嚟嘅遊戲就可以輸出去好多唔同嘅裝置同平台玩，當中包括Windows、MacOS、Linux、Android、iOS、PlayStation、Xbox同Switch等等。

Unity當初喺2005年嘅蘋果全球開發者大會公佈，嗰時只係一個專注喺Mac OS X平台嘅遊戲引擎嚟。經過一連串嘅更新之後，Unity已經演變成一個跨平台嘅遊戲引擎，更加成為獨立遊戲開發者其中一個熱門選擇。

Unity初時版本編號比較單純，例如Unity 4.x同Unity 5.x咁樣。但由2016年12月開始，由於Unity官方加快咗更新嘅頻率，版本編號就變咗由年份、各類大細更新等嘅資訊組合而成，例如Unity 2019.1.15就代表住2019年嘅第一個大版本嘅第十五次更新。為確保更新嘅節奏唔會將舊版本淘汰得太快，Unity會喺年尾將嗰年嘅更新整合成長期支援版本（Long-Term Support，簡稱LTS），喺未來兩年繼續提供穩定性同支援性嘅保障。

2023年，Unity宣佈推出用逐次安裝計收費嘅新政策，令到遊戲界極度不滿，為咗平息怨氣，Unity首先宣佈暫緩，之後再改政策嘅細節。^[1]

功能

Unity 嘅功能包括：

• 遊戲邏輯：開發人員可以用C#嚟會編寫遊戲邏輯，Unity會喺輸出嗰時自動將內容轉換成唔同平台相應嘅源碼同格式。
• 物理引擎：Unity可以模擬到地心吸力、撞擊、磨擦力等嘅效果，令遊戲道具呈現出唔同嘅動態。
• 素材連結：Unity識得偵查同追蹤專案入面唔同素材嘅加減同改動，喺用戶整理素材庫嗰時自動處理埋專案入面相應嘅連結。
• 自製渲染：Unity支援用Cg、GLSL嚟去編寫嘅Shader，為物件材質同畫面添加多變嘅視覺效果。
• 用戶介面：Unity提供咗現成嘅介面配件同素材，閞發人員亦都可以運得呢啲配件嘅源碼嚟去擴展出別樹一格嘅用戶介面。

Unity 遊戲嘅基礎係景^{[詞 1]}入便嘅遊戲物件：喺 Unity 入便，每個景都有若干件物件，物件可以係角色、燈光、鏡頭、環境或者用家介面元素都得，而且仲會帶有若干件元件，每件元件負責擔當某一功能，包括係令到件物件有個外觀、處理碰撞探測、令件物件識發光... 等。用 C# 寫手稿嗰時，仲有簡單嘅程式句，可以用嚟取得某個元件：

GetComponent<Rigidbody>()

取得子物件、另一物件嘅某元件或者指定標籤^{[詞 2]}嘅物件，都可以噉樣想像。

Unity 亦有功能，可以俾用家為唔同嘅物件落標籤^{[詞 2]}，即係將啲物件分做（例如）玩家角色、環境、敵人等嘅類，噉寫手稿教電腦物件之間要點活動嗰陣就更順手－可以例如教某個類別對帶有某個指定標籤嘅物件俾同一樣嘅反應^[2]。

用 Unity 製作二維遊戲，可以使用拼接圖調色板^{[詞 3]}：製作者可以設定一格格噉嘅網格^{[詞 4]}作為遊戲空間，並且喺網格上加上拼接地圖^{[詞 5]}話俾電腦知邊幅「拼圖」對應網格邊格；製作者跟住就可以整返塊「調色板」，引入精靈圖等嘅遊戲資產^{[註 1]}再將呢啲資產「畫」落去拼接地圖上，呢種做法夠大幅提升製作二維遊戲空間嘅速度^[3]。

出面網頁

• Unity官方網站
• Unity互助問答

註釋

1. 甚至用精靈圖編輯器自動或手動剪開多重嘅精靈圖。

詞解

1. 英文：scene，粵拼：sin1
2. 英文：tag，粵拼：tek1
3. 英文：tile palette
4. 英文：grid
5. 英文：tile map