亞洲金融風暴北京救港謠言

亞洲金融風暴中共救港謠言係一個喺中國大陸廣泛流傳嘅假信息，主要係指亞洲金融風暴期間，香港股市受到國際知名投資者索羅斯嘅衝擊，香港要中國共產黨幫助先至可以擊退索羅斯。但事實係，當時香港只係動用英殖留低嘅外匯儲備，唔涉及中共嘅資源或者官員。

香港當時應對嘅做法

1997年7月，英國殖民政府「光榮撤退」，留低843億美元香港官方儲備，包括外匯基金同土地基金信託^[1]。

雖然喺1998年3月，時任總理朱鎔基表示如果香港需要嘅話中共會幫手，但當時香港政府面對索羅斯嘅衝擊，無用到中共嘅資金，而係用咗自己嘅外滙基金入市，而當時中共嘅外滙儲備亦只有1,400億美元，同香港差唔多^[2][3]。香港政府喺呢段期間買入嘅股票，喺99年11月以盈富基金嘅名義上市，分批放返出市場^[4]。

2017年，風暴嗰陣嘅財政司司長曾蔭權喺接受傳媒訪問嘅時候，亦話成件事只係由香港本地嘅官員操作，自己都係事後先通知中共^[5]。

2019年9月，當時嘅香港金融管理局總裁陳德霖亦喺金管局嘅網站撰寫文章，提及當時嘅情況，講到喺1998年8月14號，政府財經事務局出面臨時邀約香港最大三家證券商嘅話事人，叫佢哋喺開設交易賬戶嘅問題上幫手。而成個行動事前保密，去到8月28號期指結算日收兵^[6]。

謠言嘅傳播同影響

雖然當時香港係靠自己處理危機，但係唔少中共媒體都灌輸咗呢個不實嘅講法，令呢啲謠言喺中國大陸深入民心。例如：

• 喺2016年1月，新浪財經網就曾經刊登中國股評人齊俊傑嘅文章，話香港係靠大陸出手救援，「用平準基金的方式大量收購股票托市，才最終打跑了索羅斯」^[2]。求驗傳媒之後亦喺Facebook發佈文章，批評散播呢啲謠言係可恥嘅愚民戰略^[7]。資深傳媒人陳景祥亦形容，香港當年打大鱷唔單止唔使中共幫手，反而中共要學習香港嘅經驗^[8]。
• 喺2019年8月23號，《明報》頭版刊登一則由政協委員高彥明發表嘅廣告文章，宣稱亞洲金融風暴期間「中共應港府要求，調撥巨額資金到港，徹底打垮了索羅斯」。之後，《明報》專欄作家李曉佳發表文章，點名批評高彥明篡改歷史^[9][10]。
• 喺2021年4月3號，親中派商人伍子權亦有份散播呢個謠言，喺央視新聞訪問入面，指當時係北京救港^[11]。
• 喺2024年6月28號立法會嘅午宴，中聯辦主任鄭雁雄亦再次散播呢個謠言^[12]。

亦有連登網民甚至提到，有啲新香港人（中國移民去香港嘅人），甚至係讀到大學，都相信呢個謠言^[13]。

不過，由於中國大陸唔少人深信呢個講法，結果喺一啲中港矛盾問題上，一啲中國大陸網民就會提及呢個虛假消息，講到中共點樣幫香港，但係香港就反骨唔聽話^[2]。

睇埋

• 英國阻礙香港民主自治制度謠言：另一個喺香港親中派同埋佢地支持者廣泛流傳嘅謠言
• 中國對香港恩賜東江水謠言：另一個喺香港親中派同埋佢地支持者廣泛流傳嘅謠言