捷思法

捷思法（粵拼：zit6 si1 faat3），又有叫啟發法，係認知科學上嘅一個概念，指人類，或者人工智能，思考嗰陣可以用嘅認知捷徑，即係一啲簡單、唔洗做好多運算、可以用嚟解難嘅法則：解難嘅過程可以想像成由 input 到 output 嘅過程；當個個體接收到輸入嗰陣，佢內部要做一啲運算，計出解難方案做輸出；完美理性嘅個體做呢啲運算嗰陣時，會達到一啲好理想化嘅條件，好似係手上有齊晒所有必需嘅資訊、能夠完全準確計出每個選項嘅效益、以及係會一心一意揀選令自己效益最大化嘅選項；但要喺現實做完美理性嘅運算，通常要用大量資源，因而不切實際，所以現實世界嘅人類同第啲動物多數會用一啲較簡單嘅運算方法，計出解難方案。

呢啲簡單法則未必能夠達致原則上最理想嘅結果（即係次佳，suboptimal），但勝在可以幫人類以高速度解難^[1][2]。

詞源

捷思法個英文名叫 heuristics，嚟自希臘文發現、發明噉嘅意思^[3]。

概論

睇埋：認知、決策同算法

舉個例子說明，想像有個人家陣去超市買餸，想買意粉，如果佢想做完全理性嘅決策，（根據理性嘅定義）佢要諗過度過嗮所有有得買嘅意粉牌子，諗出一套基準決定一隻牌子點先謂之好，量度吓每一款有幾能夠滿足佢嘅慾望（價錢貴唔貴、有幾好食等），再用一個效用函數計吓邊隻牌子效用最高，而某隻牌子嘅效用可以（例如）用呢條式計：

${\displaystyle u(x,T,H)=x+2T+H}$，

當中 u 係效用（英文：utility；又叫效益），x 係買咗之後淨低嘅錢反映嘅效用，T 反映隻牌子有幾好食，而 H 反映隻牌子有幾健康（假設呢幾個數都可以用同一單位量度）。計咗呢條數之後，嗰個人就要揀效用最高嗰隻牌子，令自己效用最大化；佢又可以就噉揀佢買開嗰隻牌子－揀買開嗰隻牌子嘅意粉就係捷思法；呢個捷思法未必可以達到最理想嘅結果－例如可能有一隻好好味、但佢未試過嘅意粉牌子（搞到用呢個捷思法達唔到最高嘅可能效用），但就幫到個人手慳好多時間。喺日常生活當中，人類做嘅經濟決策多數都係用捷思法做嘅－事實係，如果人類吓吓用完全理性嘅方法做決策嘅話，佢哋就要嘥好多時間做運算，喺實際應用上根本唔可行^[4][5][6]。

類型

例如可得度捷思法就係一種捷思法。可得度捷思法講緊人類思考嗰陣，成日都淨係靠自己即時諗得到嘅例子嚟做判斷，好多時都會因而喺思考上出現偏誤。

可得度捷思法會明顯噉左右人對風險嘅判斷。例如實證研究表示，人類做決策，決定係咪要食煙嗰時，會或多或少噉憑住

• 有幾常聽到有人因為肺癌而死

嘅記憶—呢個過程明顯能夠受易搵度捷思法左右—嚟作出自己有幾大機會患上肺癌嘅風險判斷。

睇埋

• 思考
• 效益
• 行為經濟學
• 人類智能嘅進化