平面設計

平面設計^{[註 1]}（英文：graphic design），又叫傳意設計（communication design）或者圖像設計，係指運用顏色、文字、插圖、相、動畫同編程等等嘅設計元素，透過一個過程，將一啲可能貎似冇乜關係嘅概念作出視覺上嘅整理，令到啲嘢變成有意義、有層次、會吸引人接收嘅訊息，從而達到某種傳達訊息嘅目標嘅設計領域^{[1]:144 [2]:12}。

平面設計可以細分成包括廣告設計、美術指導、品牌設計、動畫設計、公司通訊、報刊設計、環境平面設計、資訊設計、互動設計、包裝設計、網頁設計等等^[2]:12–15。

代表平面設計嘅國際專業組織係總部設喺滿地可，前稱 Icograda（國際平面設計協會聯會）嘅 ICO-D（國際設計聯會）。