堆疊為本嘅編程語言

堆疊為本嘅編程語言（英文：stack-based programming languages）係指一啲以系統堆疊為中心嘅語言，一個常用嘅例子係 PostScript。

例

PostScript

PostScript 實際上有極少嘅語法，基本上淨係夠個直譯器認得出數字、字串、名、特別符號等等嘅 token（台譯 ｢符記｣）。望落好似語法嘅嘢其實都係算子操控系統堆疊嘅結果。以下係一啲例子：

C 語法	PostScript ｢語法｣	實際上發生乜嘢事
1 + 2 * 3	2 3 mul 1 add	將 2 推上堆叠，再將 3 推上堆疊。 mul 算子喺堆疊攞兩個數，乘埋，推個結果上堆疊。 將 1 推上堆疊。 add 算子喺堆疊攞兩個數，加埋，推個結果上堆疊。
if (a == b) { taska(); }	a b eq { taska } if	將 a 推上推疊。 將 b 推上推疊。 eq 算子喺堆疊攞兩個數，比較佢哋係咪相等，推個結果上堆疊。 { 算子推一個記號（mark）上推疊，直譯器記住讀緊碼塊。 推 taska 呢個名上堆疊。 } 算子將記號到堆疊頂嘅嘢攞出來，掉走個記號，將呢拃嘢變成一個碼塊，直譯器知道讀完碼塊。 if 算子喺堆疊攞一個布林值同一個碼塊，如果布林值係真，就執行個碼塊。