塑膠模型

塑膠模型（玩嘅人就咁叫模型）係用塑膠啤出來，但係要自己砌嘅比例模型，未必係實物、可能係動漫或者其他故仔入面嘅嘢都得。未砌之前係淨色嘅部件，部件要自己用剪鉗鉗出來，用銼或者模型刀（或者普通鎅刀）整走啲水口^[1]；然後用模型膠水黐；黐好通常會用沙紙磨^[1]，再用筆髹或者噴槍噴模型油，然後貼水紙。如果係軍事模型，好多時會髹或者噴埋迷彩同陰影、光影等等嘅效果。發燒友會整埋地台，地台可能會再加玻璃罩。

未砌嘅模型

砌好，髤埋油嘅模型

砌好，髤埋油，整埋地台嘅模型

喺北美，好多人砌模型砌完就算，連油都唔會髹；相反，喺香港同日本，髹油、補畢地、用銼、用沙紙等等都係基本工。如果整埋地台，整地台亦都要用到好多整建築模型用嘅嘢，例如發泡膠、模型木、草粉、假樹等等。即係話佢雖然叫做玩具，其實比較似係一種手作。

模型有唔同牌子，喺香港常見嘅模型牌子包括長谷川、田宮（俗稱 ｢雙星｣）、Revell、Monogram 等等。