新思維 (香港)

新思維係香港政治組織，2016年1月3號成立，發起人包括前民主黨員黃成智、周奕希、狄志遠等。佢哋嘅定位係香港中間派，主張走「第三路線」。^[1][2]不過組黨冇耐，曾經有一段時間土崩瓦解，越嚟越碎片化。

歷史

2015年區議會選舉，新思維派咗幾個人競逐區議會議席，不過有啲人就用獨立身份參選。最後就只係得本身自動當選嘅周奕希連任，其他人就全軍覆沒。周奕希之後喺建制派支持下，做咗葵青區議會副主席，但就唔認自己係新思維黨員，於是有傳佢放棄新思維，換副主席個位嚟坐。周奕希回應話佢係用獨立身份參加新思維活動，不過周氏後來受邀，入咗新界社團聯會做榮譽顧問。^[3]

2016年1月，黃成智代表新思維報名參選香港立法會新界東地方選區補選，結果輸咗，連選舉津貼都攞唔到，只係收得返選舉保證金。

2016年香港立法會選舉，新思維選前部署過喺5個地方選區出4條名單，但到真正出選嗰時就得番2隊人出選九龍西（狄志遠）同新界東（廖添誠）。但突然間，出選新界東嘅廖添誠同佢團隊嘅9人喺選前退選，佔新思維總黨員嘅10%，話黨內高層不單只唔鼓勵佢哋出選，重想勸退佢哋，希望集中票源去到民主思路嘅名單。^[4]而黨內另一個核心成員黃成智亦都因黨內唔支持出選社會福利界功能界別而退出新思維作獨立參選。結果新思維選前分裂，出師未捷身先死，而唯一打正新思維旗號出選嘅狄志遠名單喺競爭激烈嘅九龍西亦得萬幾票輸咗。

2016年立法會選舉之後，新思維已經好少動作。

2019年，狄志遠走咗去做宏恩基督教學院做副校長，講明唔會再參選。^[5]2019年嘅區議會選舉，新思維都冇派人參選，只係得一啲退黨成員（好似黃成智）獨立參選。

2020年，狄志遠同黃俊瑯加入由董建華同梁振英牽頭嘅親中派平台香港再出發大聯盟。

2021年，新思維同民主思路結盟，打算派人參選第7屆香港立法會選舉，結果狄志遠喺社會福利界功能界別以1400票順利當選。