枕葉

腦後腦嘅一部分 From Wikipedia, the free encyclopedia

枕葉
Remove ads

枕葉粵拼:zam2 jip6英文occipital lobe,嚟自拉丁文「ob」,拉丁文「後面」噉解)係哺乳類動物嘅四大腦葉其中一塊,位於大腦皮層最近後尾枕嗰一忽[1][2]。枕葉係哺乳類腦嘅視覺中心-枕葉病變可以搞到個人就算對好地地都變盲[3]。喺結構上,枕葉包含咗視覺皮層(visual cortex)嘅大半[2]主要視覺皮層(primary visual cortex)人稱 V1,位於枕葉嘅內側,喺鳥距溝(calcarine sulcus)裏面一路延伸到枕葉嘅最後端嗰度。

Quick facts 枕葉, 生理 ...

V1 有陣時又會俾人稱為紋狀皮層(striate cortex),而 V1 以外嘅腦部視覺區域會俾人稱之為紋外皮層(extrastriate cortex)。紋外皮層包含多個 V1 周邊嘅腦區,紋外皮層多數都係負責處理特別類型嘅視覺資訊嘅,例如梭狀回(fusiform gyrus)噉,就對人面零舍有反應(喺個人望緊人面嗰時活動特別強)[4]

Remove ads

結構

Thumb
一個人類左腦表面嘅圖解;有色嗰笪係枕葉。

枕葉係四大腦葉當中面積最細嘅,位於個大腦最近後尾枕嗰一忽,個名(無論英文名定粵文名)都係嚟自枕骨(occipital bone)嘅-枕骨係個頭殼最近後尾枕嗰舊骨,所以喺佢之下嗰個腦葉自然叫「枕葉」[5]。枕葉嘅表面由踵狀溝(calcarine sulcus)分裂,喺踵狀溝上面嘅係楔狀葉(cuneus),而喺踵狀溝對落嘅係枕葉舌回(lingual gyrus)。

同其他腦葉一樣,枕葉喺正小腦幕(tentorium cerebelli)上面[6],結構上因為小腦幕嘅阻隔而同小腦分隔開,而且由中央縱裂(longitudinal fissure)分開做兩半[7]

功能

Thumb
向前側射訊號嘅枕葉區同向後側射訊號嘅枕葉區

枕葉分做幾個功能上有差異嘅視覺區域,每個視覺區域都對應隻動物嘅視覺世界嘅一部份。呢個分區唔係靠解剖學嚟分,而係靠生理學研究嚟揾出嘅-呢啲研究會一路俾受試者睇一啲視覺刺激一路用電極探測佢哋唔同腦區嘅電活動,發覺(例如)某兩個區域雖然喺解剖上相連,但係對同樣嘅視覺刺激會有唔同反應,表示咗呢兩個區域喺功能上唔同[8]。喺功能上,枕葉大致上可以分做幾個區域:

  • 主要視覺皮層(primary visual cortex;V1)負責向第啲腦區提供一啲低層(low-level)嘅視覺資訊,「低層」係指冇乜經過個腦處理過嘅資訊,包含咗睇到嘅視野當中嘅色水同啲物件嘅方向呀噉,而唔包括(例如)啲物件歸類做乜等嘅高層資訊。主要視覺皮層有向其他枕葉區域傳訊號,包括咗向腹側射訊號嘅枕葉區(ventral stream;V2 同 V4)、向背側射訊號嘅枕葉區(dorsal stream;V3、V5、同 V6)[9][10]
  • 次要視覺皮層(secondary visual cortex;V2)收到由 V1 嚟嘅單向資訊,喺認物件當中扮演咗重要嘅角色,會按照佢由 V1 嗰度收到嘅訊號判斷睇到嘅係乜嘢物件[11]。而位於後側嘅 V3 就負責處理每件物件「喺邊個位置」同「向邊個方向郁緊」等嘅資訊[12],例如有份研究就試過噉做:研究者俾班受試者睇唔同物件嘅相,有陣時兩幅相會展示同一件物件但唔同方向擺,有陣時兩幅相會展示兩件方向相同嘅物件但係兩件物件唔一樣,結果發現,後側射訊號嘅 V3 區嘅腦活動規律主要同物件嘅方向相關,而向前側射訊號嘅區域嘅腦活動規律主要同件物件係乜有相關[12]
Remove ads

臨床研究

對於哺乳類動物嚟講,枕葉係個腦嘅視覺中心,如果枕葉是但一邊受損,噉隻動物可能會相應嗰忽視野會睇唔到嘢。枕葉病變又可以引致視覺上嘅幻覺,而枕葉同頂葉以及顳葉之間嘅連繫區域如果病變起上嚟可能會引致某啲特定嘅視覺功能受損,例如係變到唔識分啲嘢郁嘅方向、或者係唔識認顏色等等。而主要視覺受損嘅話會搞到隻動物喪失視野相應部份嘅視力[13]

發羊吊

枕葉發羊吊佔咗發羊吊個案嘅 5 至 10%。呢種發羊吊通常喺日頭發生,可以由好多視覺刺激引起,好勁嘅閃光或者好五顏六色嘅影像可以引起枕葉發羊吊,例如係某啲電視節目或者某啲視像遊戲都可以包含呢類刺激[14][15]。當枕葉發羊吊嗰陣,病人通常會見到異常嘅影像,多數病人報告返出嚟話佢哋發羊吊嗰陣見到啲好掁眼嘅光,掁眼到搞到佢哋想嘔同睇唔到嘢。發羊吊好多時喺個人細細個嗰陣經已會發生[16]

圖庫

睇埋

Loading related searches...

Wikiwand - on

Seamless Wikipedia browsing. On steroids.

Remove ads