潮州木雕

潮州木雕（粵拼：Ciu4 zau1 muk6 diu1），又或者嗌做「潮州金漆木雕」，係喺廣東嘅潮州、汕頭、揭陽嗰頭流行嘅一種民間雕刻藝術，尤其係以多層鏤通又金碧輝煌嘅金漆木雕最出位^[1]，同東陽木雕、黃楊木雕、龍眼木雕一齊畀人嗌做中國嘅四大木雕^[2]。潮州木雕歷史好耐，喺大唐時期（6 至 9 世紀）同大宋時期（10 到 13 世紀）嗰陣開始有，喺大明時期（14 至 17 世紀）尾成熟。佢犀利到喺 2006 年 5 月 20 日畀人列咗入第一批中國國家級非物質文化遺產名錄^[3]。

歷史

潮州木雕初頭嗰陣風格粗獷啲，但係去到大明時期已經好精美，今日用嘅木雕喺大清時期（17 世紀至廿世紀早期）成咗形。佢嘅歷史有得追溯到 9 世紀尾橛，喺劉恂嗰本書《嶺表異錄》入面^[4][5][6]，就有三則有關潮州雕刻藝術嘅記載。而潮州金漆木雕嘅出現，就係喺 1054 年左右就有咗文獻記錄^[7]。而喺 738 年嗰時起嘅潮州開元寺，入面保存咗一條大約 1 米長嘅唐朝木魚，同埋一條北宋政和四年嘅木龍。而許駙馬府亦都保存咗宋朝嘅樑架雕飾，雖然呢啲木雕飾物嘅刀法簡樸，但係說明咗喺唐宋時期，潮州已經有咗用嚟裝飾建築嘅木雕工藝^[8]。

藝術特色

潮州木雕

種類繁多

潮州木雕好少可會攞嚟做獨立嘅擺設，通常係同啲建築物、家俬、同埋啲神器結合埋一齊做後者嘅裝飾或者構件。照用法嚟分，大致上有得分做建築裝飾、神器裝飾、家俬裝飾、同枱頭嘅擺設四類^[9]。

建築裝飾

喺建築物度用嘅潮州木雕包括咗牌匾獅、進屏、屐頭、簷角、柱頭、橫梁、門楣、屏風、門飾、窗格、欄杆、同埋樑嘅雕飾等百幾種。雖然潮州木雕係由閩系嘅潮州人搞起嘅，但係喺粵式建築或者係粵式園林嘅園林建築物入面成日都會用到。

神器裝飾

神器裝飾，又或者嗌做「宗教用品裝飾」，分做五類：龕櫝類（包括大龕同櫝仔）、饌盒類（包括饌盒、果碟、糖枋架、同餅架等呢啲）、宣爐罩類（四方型、八角型、圓筒型、木雕加玻璃型等）、神轎神亭類、同游神配套類(包括茶擔、鼓架、燭台、香架、香爐等)。

家俬裝飾

包括床、枱、凳、衣櫃、梳妝枱、紙煤筒、燈心筒呢啲屋企成日見到嘅家俬。

枱頭嘅擺設

有啲欣賞型嘅細舊木雕。

題材嘅選擇

木雕表達嘅內容取材好廣泛，有民間故事小說亦都有啲戲劇故事，或者係地方熟悉嘅歷史人物，更多係嚟自平民嘅生活。

雕法

雕刻嘅形式有得分做浮雕、沉雕、圓雕、同通雕四類^[10]。

製作過程

廣東博物館展示嘅潮州木雕嘅刀具

潮州木雕嘅製作大致分做三個階段，第一係「起草圖」，第二係「鑿粗胚」，第三係「細雕刻」。

木材點揀

潮州木雕常用嘅木材有好多種：樟木、杉木、苦楝、黎木、殺柴、柯木、合歡木、榕木、同埋柚木呀咁。呢啲木材嘅共通點，就係質地夠結實，又有好高嘅堅韌度。實際運用嗰時要根據飾物嘅種類、用途、同內容，嚟分別咁揀所需嘅木料。其中樟木係主要嘅木材用料^[11]。

工具點揀

除咗畫草圖需要嘅弓把同夾仔，常用嘅工具有幾種：

• 叩槌，即係敲個鑿用嘅木槌；
• 方鑿刀，即係平口刀；
• 方湖刀，刀刃稍弧形，用嚟整出啲有弧度嘅形狀；
• 圓鑿刀，刀刃弧形，用嚟整圓啲嘅形狀；
• 撓鑿刀，刀口翹起同刀梗成一定嘅角度，用嚟削平喺深層其他刀掂唔到嘅地方；
• 雕刀，刀刃成銳角形，用喺劃線條同花紋嗰度；
• 毛尾刀，鏤空雕刻用嘅特製刃刀，形成長銳角形，用喺側面嘅造型刻畫嗰度^[12]。

上漆

潮州木雕除咗大幅度咁用髹漆貼金之外，重有水漆、退光漆、刀漆、金漆畫、五彩漆畫等嘅工種。一般髹漆貼金要製漆、濾漆、填料、同上漆四個工序^[13]。

圖片

• 
  普寧燎原鎮嘅潮州木雕
• 
  普寧燎原鎮嘅潮州木雕
• 
  潮州金漆木雕
• 
  潮州木雕
• 
  廣東博物館展出嘅潮州木雕用嘅顏料

睇理

• 潮州文化
• 嶺南建築
• 廣式傢俬