無國界記者

無國界記者^[1]（法文：Reporters sans frontières，縮寫：RSF，英文：Reporters Without Borders）係一個致力保護記者免受迫害並推進新聞自由嘅國際非政府組織，由羅伯特·梅納德（Robert Ménard）喺1985年喺法國蒙彼利埃創立。總部設於巴黎，並且喺亞、歐、美、非設有14家辦事處（喺美國有兩個辦事處，分別位於華盛頓同埋三藩市）^[2]。

無國界記者係國際言論自由交流會（英文：International Freedom of Expression eXchange）（IFEX）嘅成員。IFEX係由全球60幾個非政府組織組成嘅網絡，喺世界範圍內監察言論自由被侵犯嘅狀況、促進並捍衛言論自由嘅權力^[3]。喺無國界記者發表嘅報刊、出版物中指出：無國界記者捍衛全世界被囚禁記者嘅權利同埋新聞自由，即係《世界人權宣言》中第19條描述提供信息同埋獲取信息嘅權利。^[4]

無國界記者喺2005年獲歐洲議會授予自由精神薩哈羅夫獎^[5]。

關注議題

中國「大外宣」

内文：中華人民共和國對外宣傳

無國界記者組織喺2019年3月發佈嘅報告提到，中國正試圖喺全球範圍建立「全球傳媒新秩序」，通過將自己嘅國際電視廣播現代化、投資外國媒體，同埋喺國際媒體上大量購買廣告，以防範同埋反擊對中國政府嘅批評。