物件導向設計

物件導向設計（英文：object-oriented design）係指攞個軟件設計上撞到嘅問題，諗計度出一個由物件組成嘅系統（物件導向編程）用嚟解決個問題，不過仲未郁手寫源碼。

仲未郁手寫源碼，但位軟件工程師經已喺度畫圖度定橋：個程式要有以下若干個類別，當中
單車（bike） 係
交通工具（vehicle）嘅子類別。

基礎

睇埋：物件導向編程同軟件設計

舉個例說明，想像家陣有位遊戲製作師想要郁手開發一隻新嘅射擊遊戲，簡化噉講佢隻遊戲要呈現一個虛擬世界俾玩家睇，玩家要能夠喺個世界入面郁動同埋射擊虛擬嘅敵人；噉即係表示，隻遊戲嘅虛擬世界（一個程式）最低限度要有以下呢啲物件^[1][2]－

• 玩家控制嘅角色－呢件物件要曉按玩家撳嘅掣決定點郁；
• 若干個虛擬敵人－呢啲物件要曉郁、曉探測玩家角色嘅位置、曉生成虛擬子彈嚟攻擊玩家；
• 若干嚿障礙物－呢啲物件每件都要有變數表示佢嘅位置，通常唔會點做其他嘢；

... 呀噉。位遊戲製作師要度好嗮「要有咩類別」、「要有咩物件」、「每個類別要有咩特性同方法」^[3]... 呢啲咁多問題（但仲未郁手寫源碼）嘅過程就係軟件設計，而好似上述個例子噉喺諗計階段經已打算用物件導向編程，就係所謂嘅物件導向設計^[4]。

睇埋

• 電子遊戲設計