單車

  提示：呢篇文講嘅唔係單轆車。

單車（Bicycle），又叫雙轆車、雙輪車、腳車、自行車，係兩轆嘅腳踏車，人力踩郁，需要少少平衡力先可以踩。

單車

而用單車就叫踩單車。踩單車嘅人就係單車手，而參與單車比賽嘅就係單車選手^[1]。

簡史

由槪念到兩輪木馬

Laufmaschine

最早追溯到十五世紀，已經有「騎住一部兩轆車作代步」嘅槪念圖。例如達文西嘅學生Gian Giacomo Caprotti da Oreno喺1493年畫嘅設計圖。但一般相信，1817年至1818年之間德國人Karl Drais男爵發明嘅Laufmaschine先至係單車嘅始祖。但係呢種兩輪木馬並無傳動裝置，要靠騎手雙腳撐地推郁架車^[2]。

1830年代

Velocipede

第一部真正靠騎手踩腳踏帶動車轆轉動嘅單車應該係蘇格蘭人Kirkpatrick Macmillan嘅後輪驅動單車。呢部單車以一系列踏板同槓桿構成傳動系統，同現代以鍊條傳動嘅單車好唔同^[3][4]。

前輪驅動以及Penny-farthing

• 
  Penny
• 
  Farthing
• 
  Pierre Lallement's Pedal Machine
• 
  Pickering and Davis's pedal-bicycle for ladies
• 
  Penny-farthing

1860年代至1890年代期間，流行前輪驅動嘅單車。由於前輪直徑直接影響騎手每踩腳踏一圈單車前進嘅距離，所以單車前輪越嚟越大。由於前輪比後輪大好多，尤如將當時英國兩款硬幣（Penny同Farthing）擺埋一齊咁，所以呢類單車叫 Penny-farthing^[5][6][7]。

高重心帶嚟安全問題，騎手一旦炒車會受重傷，所以當時踩單車係一項攞條命嚟較飛嘅玩意。

「安全單車」同其後

• 
  博物館中嘅 Rover
• 
  Penny-farthing vs Rover
• 
  單車進化圖

1885年，英國人John Kemp Starley將旗下生產嘅單車改用鍊條同齒輪嚟驅動、又裝配直徑統一嘅前後轆；新設計單車以 "Rover" 之名推出市場，反應熱烈。由於比起 Penny-farthing，"Rover" 踩起嚟較為安全穩定，所以後嚟 "Rover" 單車被稱為「安全單車」^[8]。

1888年，蘇格蘭人John Boyd Dunlop發明咗充氣式車胎，令行車舒適性大增^[9]。

因為踩單車唔再係玩命嘅危險玩意，單車活動亦開始普及^[10]。

十九世紀末至二十世紀初，斜躺單車（Recumbent bicycle）面世，由於呢種單車喺風阻以及車手發力等各方面都具有優勢，以至國際單車聯會（Union Cycliste Internationale，UCI）喺1934年禁止呢類單車參賽。

1910年代，單車變速器面世。

單車基本結構

單車各部分嘅名（英文）

一架典型單車嘅基本結構包括車架、傳動系統（包括車轆、外內輪胎、腳踏、單車鍊、齒輪）、燮位 / 座椅、制動系統、手柄，成個結構組合由 1885年第一部有鏈單車出現之後冇乜變過^[11] 。不過𠵱家嘅設計細節上已經改進咗好多，好似用電腦幫手設計；現代物料（鈦，碳纖維）；個人化、特別用途設計等。

單車響歷史上有佢嘅影嚮力，無論喺文化或者工業嘅範疇。早期嘅造單車用當時嘅技術，家下研究、設計、造單車嘅科技唔單止用咗現代嘅技術，重提出啲嶄新嘅概念^[12]。

單車用途及種類

• 
  公路單車
• 
  實用單車
• 
  中國天津飛鴿PA-02單車
• 
  旅行單車
• 
  山地單車
• 
  摺疊單車
• 
  BMX
• 
  鈄躺單車
• 
  單車表演

單車最先響 19世紀嘅歐洲出現；到咗而家，全世界嘅單車有成十億架^[13][14]。係世界各地主要嘅交通運輸工具，好似中國大陸同荷蘭咁。踩單車作為消閒活動亦大受歡迎，單車嘅其他用途有：畀細路玩、運動（keep fit）、速遞員送速遞、郵差派信、警察巡邏、緊急醫療、軍事用途、單車比賽……

今日嘅單車，因應唔同嘅用途而發展出唔同類型嘅單車。例如室內場地競賽單車、公路賽單車、山地單車、貨運單車等等。

電動單車

内文：電動單車

單車嘅動力係人用腳踩，即係人力。為咗唔使踩咗咁辛苦或者慳力，有人就將細型嘅電動摩打安喺單車之上，提供有限嘅動力，電動摩打同電池一般好細同唔起眼，同普通嘅單車差唔多。

震骨車

震骨車（或者叫骨震車）係一個1860年代嘅名，指第一種真係有單車嘅腳踏，製造商叫佢哋做velocipedes。「震骨車」指嘅係非常唔舒服嘅踩車感受，因為佢哋用咗硬嘅熟鐵車架同埋木製嘅車轆，車轆仲有鐵製嘅車軚。

歷史

所謂嘅「震骨車」喺1860年代喺法國發明，第一間整嘅公司係Michaux公司，由1867年到1869年 ，嗰陣時係第一次單車熱潮單車熱潮嘅時候。嗰段時間，好多其他人都學人整震骨車。喺1869年夏天之後，震骨車就開始唔受歡迎，喺1870年俾另一種單車換走，嗰種單車叫做「ordinary」、「high-wheel」或者「便士單車」。

而家好少有原裝嘅震骨車剩低，大部分喺第一次世界大戰期間都俾人熔咗佢變廢鐵。^[15] 間唔中出現嘅震骨車價錢都好貴，通常賣到五千蚊美金左右。^{[未記出處或冇根據]}

設計

震骨車嘅結構同Dandy horse好似：木製車轆，鐵車軚，同埋熟鐵嘅框架。正如個名暗示，震骨車真係勁唔舒服，但係都叫做舒服咗啲啲，因為佢哋用咗一條長而扁平嘅彈簧嚟支撐鞍座，吸收咗爛路嘅震盪。震骨車仲有制動器，一個金屬槓桿，用一個金屬槓桿，將塊木墊壓落後轆度。前轆嘅車軸喺潤滑嘅青銅軸承入面轉，有啲仲整咗細細個潤滑油箱，可以將浸咗油嘅羊毛啲油吸入軸承，令佢哋轉得順啲。就好似高轆單車喺19世紀後期開始興起咁，震骨車都係前轆驅動，但係比較起嚟，佢哋嘅車轆細啲（得嗰1米左右），而且都幾重，輕型型號都重14公斤（30磅）或者仲重。

• 
  歐洲「震骨車」單車，約1868年。
• 
  Michaux 震骨車有條直嘅下管同埋羹制。
• 
  便士單車，喺愛沙尼亞體育及奧林匹克博物館（塔爾圖，愛沙尼亞）。