環境平面設計師

環境平面設計師係專事環境平面設計嘅人，負責計劃同設計各種室內外識別牌、指示牌、展覽陳設、同其他喺人造同天然環境用嘅各種視覺通訊^[1]:14[2]。環境平面設計師會好少做其他嘅種類嘅平面設計。因為涉及唔同領域嘅知識，環境平面設計師通常唔會單獨做嘢，而係同幾個設計師一齊喺工作室做，亦可能係喺則師樓做^{[3]:172–173}。

喺日常做嘢嘅時候，環境平面設計師會要同招牌師傅或者公司（fabricator）打交道，最好有相熟嘅師傅或者公司，知道佢嘅手勢或者品質好唔好，因為雖然環境平面設計師識設計，落手做嘅都係啲師傅，有乜新物料、新技術都會係啲師傅知先；環境平面設計師會可能要幫手搵師傅，但係如果客人判咗畀唔好手勢嘅師傅，做壞個名嘅都係個設計師而唔係個師傅^[4]:141。另外，到真係安啲牌嘅時候，環境平面設計師會亦都可能要監工^[4]:138。

做環境平面設計師要識好多同平面設計好似冇乜關係嘅嘢，包括睇圖則、點起樓、建築條例、物料特性、燈光、點樣製造實物、距離同速度點樣影響易讀性等等^[3]:172。截至2013年左右，雖然開始有大學有環境平面設計嘅課程^[5]，但係如果想入行，最好嘅途徑仍然係學師^[3]:172。

環境平面設計唔係一個受規管嘅行業，但係都有代表環境平面設計師嘅專業組織，係總部設喺華盛頓嘅 SEGD（環境平面設計師協會）^[3]:173。

睇埋

• 畫則師
• 博物館