自我意識

自我意識（粵音：zi6 ngo5 ji3 sik1）係一種心靈或者心理狀態，指個個體意識到自己係一件獨立物體，有別於周圍環境以及第啲個體。若果話某個個體具有自我意識，即係話佢理解到自己係擁有思緒、感受、身體同經驗嘅實體。心理學同哲學等領域嘅學者廣泛認為，自我意識係「高層次」嘅認知能力，涉及對自我作出內省式嘅思考。

呢幅西洋畫描繪一位畫家照住鏡畫自畫像。佢識畫自畫像就表示，佢心知自己係一件有別於其他嘢嘅物件。

基本概念

睇埋：認知、自我同心靈

自我意識係心理學同哲學當中經常探討嘅概念，泛指一種心靈狀態，個體能夠辨識到自己係一個獨立存在、同外界分開嘅實體，識得分清楚自己嘅思緒、感受同身體狀況，唔會將佢哋同周圍環境混淆。喺認知科學同相關學術領域之中，自我意識一般會當係自我概念嘅其中一個基礎組成部份—如果一隻生物具備自我意識，通常代表佢有能力用反省式角度去觀察自己，甚至理解同分析自己內在係以咩方式運作，思考例如我點解會噉思考、我依家係咩狀態等嘅問題^[1][2]。

人類展現自我意識嘅方式有好多種。研究指出，出咗世 18 至 24 個月之後，多數BB 仔已經可以通過鏡測試，表示佢哋明白鏡中嘅影像其實就係自己^[3][4]。除咗視覺上嘅識別之外，語言都係好關鍵嘅指標：人類會使用第一人稱代詞（例如我、在下）嚟講述自己嘅內在狀態，好似我好攰、我唔開心等等嘅語句，都反映講者有能力察覺自己內部感受。同時人類亦能夠反思過去嘅行為、為將來作出計劃，甚至構建屬於自己嘅身份認同。呢啲能力通常都被視為高度自我意識嘅外在表現^[5]。

實驗研究

呢條短片顯示有隻歐亞喜鵲照鏡，佢見到自己身上有笪嘢就嘗試清理。

内文：鏡測試

鏡測試係一種用嚟研究動物嘅自我意識嘅實驗方法，最初由一位美國心理學家提出，至今已經成為動物認知研究之中其中一種最具代表性嘅實驗。測試嘅做法係將一個無害嘅標記（例如一笪顏色）加喺動物身體某個平時睇唔到嘅位置，例如額頭，然後俾一塊鏡畀佢。如果隻動物見到鏡中影像之後會試圖觸碰或者清理標記，佢就算係明白鏡入面嗰個係自己，亦即係通過咗鏡測試。

一般相信，能夠通過鏡測試嘅動物實係一定程度上有自我意識嘅：即係佢有能力將自己當成一個對象噉去觀察，意識到自己係一件獨立存在嘅物體，同環境或者其他動物分得開。實驗結果顯示，大多數動物物種都冇法通過呢個測試。到廿一世紀初為止，通過鏡測試嘅物種包括：人類、黑猩猩、大笨象、海豚、虎鯨等等。不過即使同一物種入面，唔同個體之間亦存在差異，例如有研究發現，大約 75% 嘅年輕成年黑猩猩會通過鏡測試，但年紀太細或年老嘅個體通過率就會下降。^[6]

鏡測試受到廣泛採用，但亦不乏爭議。

神經研究

睇埋：鏡神經細胞

其他應用

科幻作品好多時會將自我意識描述成一種人類「特有」嘅特質，喺某啲作品之中，呢種特質甚至會賦予「人格地位」俾非人類嘅角色，即係例如如果機器、人工智能、外星生物，甚至某件物件「有咗自我意識」嘅話，讀者一般會假設佢將會被當成人類噉嚟對待——包括擁有類似人類嘅權利同慾望^[7]。

有管理學等領域嘅研究指，討論領導能力嗰陣，要留意「自我」既有個人層面，亦有集體層面，而自我意識係領導能力嘅重要因素。^[8]

睇埋

• 自我
• 智能