蔣麗芸

蔣麗芸，SBS，JP（英文：Chiang Lai Wan Ann，1955年5月16號—），花名「元秋」^[1]，係香港立法會前議員，民建聯副主席，工業家蔣震第二女，而家仲良集團董事長。第5屆香港立法會選舉循九龍西選區成為香港立法會議員，重榮膺地區直選嘅「票后」。

蔣麗芸
出生日	1955年5月16號  （70歲）
出生地	英屬香港
國籍	英屬香港、中華人民共和國
識嘅語言	港澳粵語
母校	Concordia University、香港中文大學、中國社會科學院
職業	政治人
政黨	民主建港協進聯盟
配偶	梁海明
阿爸	蔣震
兄弟姊妹	蔣麗萍、蔣麗莉、蔣麗苑
[改維基數據]
睇 傾 改

經歷

蔣麗芸祖籍山東菏澤，香港出世，細個一家8口住大磡村木屋仔^[2]。1981年加拿大心理學畢業。返香港幫震雄集團大陸發展。1988年創立香港青年工業家協會，培養工業人才。

2014年2月參加歌詩達郵輪海南島、越南六天遊，因不滿下龍灣旅程被臨時取消，同100幾名遊客返香港之後佔領郵輪唔肯落船，令郵輪新一批旅客行程受阻。最後成功爭取遊客攞到代理商美麗華旅遊嘅補償^[3]。

公職

• 全國政協委員
• 香港青年工業家協會創會會長
• 香港中華總商會名譽會董
• 香港青年協進會榮譽會長
• 兩岸和平發展聯合總會第4/5屆榮譽顧問^[4][5]

曾任

• 香港城市大學、嶺南大學、香港大學校董

個人榮譽

• 香港青年工業家獎（中文：香港青年工業家獎）（1988年）^[6]
• 香港工業專業評審局榮譽院士
• 太平紳士（2011年^[7]）
• 香港城市大學榮譽院士（2012年）^[8][9][2]
• 銀紫荊星章（2018年）^[10]

政治立場

佢係香港親中派一員。

選舉及提名經歷

喺2016年，佢有份提名林鄭月娥參與2017年香港行政長官選舉^[11]。

爭議

論壇表現

2012年8月，喺無綫電視立法會九龍西選舉論壇上，蔣麗芸俾黃毓民問到中華人民共和國國旗嘅五粒星代表乜嘢，蔣麗芸答四粒星仔代表「工、農、兵、商」^[12]。黃毓民指正，四星分別代表工人、農民、小資產階級同民族資產階級。黃毓民隨即又問佢喺1958年推行嘅「三面紅旗」係乜嘢，佢冇答，黃毓民指，分別係人民公社、總路線同大躍進。在場嘅公民黨毛孟靜揶揄蔣麗芸以愛國自居^[13][14]。

武漢肺炎疫情期間提議『蒸口罩』消毒捱轟

蔣麗芸喺2020年1月29號喺個人Facebook專頁貼咗一條嚟自廣州廣播電視台《G4出動》嘅片段，提議市民可以蒸口罩消毒^[15][16]。但佢呢個建議，引嚟港大感染及傳染病中心總監何栢良炮轟，話影片係假新聞，內容大錯特錯兼害死人。何又舉例話，喺2003年沙士爆發期間，就有醫護人員因為重覆使用口罩而受到感染。中大呼吸系統科講座教授許樹昌亦都話，蒸口罩或紫外光消毒嘅方式並唔可行，又強調外科口罩用咗幾個鐘就要棄置，高溫消毒反而會破壞口罩嘅三層結構^[17]。除咗醫護人員嘅批評之外，藝人關淑怡亦喺2020年2月1號喺社交網站諷刺政府，指責政府喺疫情持續，確診病例不斷上升嘅情況下仍然拒絕封關，無視市民生命安全，又批評蔣蒸口罩消毒嘅建議冇常識，仲叫對方試試搵對波鞋嚟蒸，睇下蒸完仲著唔著到^[18]。另外，亦有網民實測一次蒸口罩消毒，結果將口罩幾乎蒸融，引起大批網民討論^[19]。

蔣麗芸呢次嘅言論，成為咗一啲研究醫療假資訊嘅學者，引述嘅案例^[20]。

喺維吾爾族種族滅絕問題上以假新聞為中共辯護

喺維吾爾族種族滅絕問題上，蔣麗芸同中共保持一致立場。中國外交部發言人華春瑩喺2021年3月26號嘅記者會上播放片段，指美國退役陸軍上校、前美國國務卿鮑威爾嘅幕僚長韋加臣親口承認新疆維吾爾族問題，只不過係美國對中國戰略陰謀。有關內容之後被證實係誤導內容，但包括蔣麗芸在內嘅一啲親共派人士同組織，都積極散播呢啲內容^[21]。