香港大學
香港一間公立大學 From Wikipedia, the free encyclopedia
Remove ads
香港大學（粵拼：hoeng1 gong2 daai6 hok6，簡稱港大，英文：The University of Hong Kong，HKU）係香港一間研究型大學，校舍主要分佈嚮香港島薄扶林一帶。1911年成立，1912年開校，係香港第一間大學，喺好長一段時間內亦係香港唯一一間大學。大學依家有十個學院，學科繁多，包括法律、心理學、生物醫學等等。學校喺世界前列，係全世界第一支可以認到沙士病毒嘅研究隊伍，亦都培養咗好多法律、政治、商學、科學同醫學界等等嘅社會名人。
 |
Remove ads
歷史
1910年3月16號，當時嘅港督盧吉主持港大本部大樓嘅動工儀式。1911年3月30號，港大正式成立。1912年3月11號舉行開幕禮，同年，第一屆學生入學。大學最初淨係得三個學院：醫學院、工程學院同埋文學院。醫學院嘅前身係喺1887年創立嘅香港西醫書院，孫中山都喺呢間書院讀過醫。1916年12月舉行第一屆畢業禮，有23個畢業生同5個榮譽畢業生。1941年因香港淪陷而停辦，到1945年復辦。1961年學生人數係2000，係1941年嘅四倍。1989年後因政府增加大學學位令到學生人數倍增。2002至2003學年有學生19000人。2012年起好咗百週年紀念校園，並且跟從香港教育改革，本科教育轉成四年制。
二戰時期
1941年12月8號，日軍開始侵略香港，香港保衛戰隨即展開。嗰朝早啟德機場俾日軍空襲嗰時，大禮堂[註 1]門口仲圍住大批學生等緊八點半考試。冇幾耐消息傳到，考試暫停；大禮堂亦改造成臨時醫院，幫瑪麗醫院接收傷者[7]:66–67[9]:63。其實戰火殺到嚟香港之前，絕大部分港大師生已經喺義勇防衛軍、聖約翰救傷隊呢啲組織幫緊手備戰[9]:63。學生會亦眾籌買咗救護車同戰地醫院，由學生親身送上大陸[7]:66–67[9]:61。喺校長史樂詩安排底下，校方甚至讓埋地方俾友校廣州嶺南大學安置師生器材繼續教書，直到港大都局住停課為止[9]:61–62。
隨住日軍進駐，好多嚟自馬來亞等地嘅留學生都被軟禁喺梅堂宿舍。大多數外籍教職員亦俾人
二戰除咗帶走港大唔少師生嘅性命，亦為大學帶嚟財產方面嘅損失。理學院同醫學院長年儲落嘅文書記錄同研究器材，喺淪陷冇耐就俾日軍擸走嗮。之後嗰三年零八個月，中門大開嘅港大又再連番俾災民幫襯，以致值唔值錢嘅都一鋪清袋[9]:64。相比之下，敵方炮火對大學建築嘅破壞可以算輕擎。當時新落成、損傷得最嚴重嘅羅富國科學大樓都只係俾卑路乍炮臺嘅自己友誤傷[9]:64。反而戰亂期間為咗揾燃料，好多棟樓俾人拆到皮包骨噉先最嘥資源重建[7]:68[8][9]:64, 80；大禮堂到1950年學位頒授典禮嗰日都仲露緊天[10]:78–79[註 2]。
Remove ads
校園同建築
本部校園
香港大學本部校園坐落喺港島般咸道同薄扶林嗰頭[註 3]，佔地約莫14[11]到16公頃[12]。港大嘅十間學院入面有五間都喺呢度，佢哋係：建築學院、港大經管學院、教育學院、工程學院、同埋理學院[11]。除咗圖書館總館同美術博物館之外，本部校園仲設有一條叫做大學街嘅雙層行人通道，駁去西面嘅百周年校園[12]。
本部校園嘅主要特色係嗰度建築風格嘅多樣性，由新古典主義嘅本部大樓到七十年代嗰時起嘅現代建築都有[11]。經過咁多年嘅保育同發展，有人讚呢度係「中西合璧、新舊共融」嘅校園[12]。計埋本部大樓，港大嘅七棟法定古蹟入面，有六棟都喺本部校園，包括孔慶熒樓外部、馮平山樓外部等等[13]。
百周年校園
為咗應付三三四新學制同增收非本地生帶嚟嘅額外四成學生[14][15]，港大喺2005年開始規劃向本部校園以西擴建。工程喺百周年校慶之後冇耐搞掂，2012年啟用[16]。百周年校園主要有三棟樓，俾文學院、社會科學學院、同法律學院使用。另外仲有間6000平方米大嘅「智華館」研習坊，近乎全日開放俾學生自主學習[11][14]。
百周年校園選址「唯一一幅」本部校園隔籬嘅可發展用地，原先係西區抽水站及濾水廠[14]。校方畀咗水務署五億去重置配水庫[15]，包括將鹹水水塘搬入龍虎山岩洞，做法全港首創[14][17]。原本嘅食水配水庫攞咗嚟做李兆基會議中心，係一座容納成千人嘅音樂廳兼講堂；附近三座歷史建築就活化保留[14][17]。百周年校園另一個特色係有大量嘅綠化元素，除咗屋頂綠化之外，仲有百周年花園同三座學術庭園[12][14]。
沙宣道校園
沙宣道校園又叫醫學院校園，主要係港大李嘉誠醫學院用緊，設有各式各樣嘅實驗室同先進設備[18]。校園位於港島西沙宣道，同本部校園相距三公里左右[11]，平時有校巴往來[18]。馬路對面嘅瑪麗醫院由落成開始就已經係醫學院嘅教學醫院，大部分臨床學系都會喺呢度上堂，並且有行人天橋連接其他教學樓[11][18]。
余振強醫學圖書館設喺沙宣道21號蒙民偉樓[11]，係世界衞生組織嘅托存圖書館之一。館内收藏咗大量生物醫學同衛生科學刊物，有啲仲可以追溯到醫學院嘅前身華人西醫書院[18]。為咗應付空間需求，醫學院制定咗全面發展計劃[18]。長遠嚟講除咗會起新嘅教學大樓，亦會擴展學生宿舍，同起一條「大學行人走廊」連接成個沙宣道校園[19]。
其他設施
- 菲臘牙科醫院
位於西營盤嘅菲臘牙科醫院係港大牙醫學院嘅教學醫院，佢同本部校園只有一段仔距離[11]。醫院由政府資助，專門提供訓練牙醫同牙科輔助專業人員嘅設施[20]。除咗臨床教學設施之外，港大嘅牙科圖書館亦喺呢度[11]。
- 嘉道理中心
香港大學嘉道理中心喺一九八零年代，由賀理士．嘉道理爵士同羅蘭士．嘉道理勳爵捐錢起成。中心位於香港石崗，佔地十公頃，遠離煩囂、環境寧靜。呢度唔只係研究農林園藝同環境科學嘅地方，亦有唔少住宿設施，方便校内外團體搞迎新營、研討會等等活動[21]。
- 太古海洋科學硏究所
太古海洋實驗室喺1990年開幕，1994年擴建之後改用依家呢個名。研究所位於鶴咀，喺正香港唯一一個海岸保護區隔籬，主要俾理學院嘅研究生做海洋科學方面嘅研究[22]。1955年喺香港海域發現、被稱之為「港鯨」嘅長鬚鯨嗰副骸骨標本就係喺呢度收藏展示[23]。
Remove ads
聲譽
香港大學同香港中文大學、香港科技大學合稱「三大」，係香港校譽最好、排名最高嘅大學之一[24][25]。其中港大喺唔少人心目中排三大嘅頭位，好受家長同僱主歡迎[26]。港大公佈嘅2023年學士學位畢業生就業率有98.8%，連續十八年達成「全員就業」，體現出港大畢業生嘅市場價值[27]。
學術方面，港大嘅研究風氣以往冇其他大學咁濃烈。不過隨住增收海外學生等等政策推行，港大已經穩步向呢方面發展，研究成績都唔少見[26]。科睿唯安（英文：Clarivate）公佈嘅「2024年度最廣獲徵引研究人員」入面就有53位學者嚟自港大，晉身全球院校同科研機構頭十[28]。
排名
港大喺2026年 QS 世界大學排名入面攞第11名[29]，比2025年升咗六位[33]，創歷嚟最高記錄[34]。泰晤士高等教育就將香港大學排喺2025年全球第35位[30]，高前一年一位[35]。區域排名方面，QS 嘅2025年亞洲綜合排名，港大已經第二年僅次北京大學排第2[31][36]。至於泰晤士嘅2025年亞洲排行榜，港大繼續排第6，照舊係本地大學名次最高嗰間[32][37]。
港大唔單只整體排名唔錯，仲有唔少學科位列全球頂尖。2024年 QS 學科排名裏面，就有11科躋身全球前廿五，其中牙科學更加排到頭三。其他幾科分別係：教育學、建築與建造環境、地理學、語言學、土木和結構工程學、法律學、社會政策與行政管理、現代語言學、社會學、以及信息科學和人工智能[38]。
爭議同大事
張祺忠殺妻案
内文：張祺忠
港大宿舍偉倫堂喺2018年8月17號發生咗一單倫常命案——時任舍監兼機械工程系副教授張祺忠用電綫箍死咗佢老婆[39]。佢製造咗死者離家出走嘅假象之後報警話老婆失蹤，並且喺黃克競樓辦公室藏屍[40]。差佬8月28號上門調查嗰陣發現屍體，拉咗張祺忠[39][41]。時任校長張翔喺第二日開學禮致辭嘅時候主動提起單嘢，形容係令人驚訝嘅校園悲劇[41]。
案件2020年喺高等法院開審。張祺忠否認謀殺、承認誤殺，但控方唔接納[42]。辯方呈上三百幾人嘅求情信，又有專家證人證明被告成日俾死者心理虐待搞到抑鬱，先會失控殺人[42]。但控方話張祺忠犯案冷靜，殺人係出於金錢糾紛[43]。張祺忠最後被判處終身監禁，謀殺同阻止合法埋葬屍體罪嘅刑期同時執行[42]。佢不服刑期上訴得直，案件被發還重審[44]。
唔承認學生會
2021年7月1號，有差佬喺銅鑼灣俾人用刀拮傷，疑犯梁健輝其後自戕。香港大學學生會評議會7月7號開會，通過動議「感激」梁健輝為港犧牲[46]。呢單嘢引嚟各方評擊，連評議會撤回議案、學生會幹事會全體請辭都平息唔到[47]。校方亦發聲明譴責佢哋美化暴力、損害校譽，並喺7月13號表示唔再承認學生會喺校内嘅角色[48]，被質疑違反咗《香港大學規程》[49]。
港大繼四月宣佈唔再代收會費並收返民主牆等等設施[50]，今次更係要求學生會搬走[51]。新設立嘅課外活動支援處取締咗學生會接手屬會，但有學生組織因為後來用咗提及學生會嘅舊名而被除名[52]。到八月，校委會再禁止涉事學生進入校園，唔俾佢哋上堂或者返宿舍[46]。有傳媒形容港大嘅做法係「封殺」學生會[46]。
Remove ads
法律地位
香港大學屬於香港法定院校，由香港法例第1053章規管。
交通
睇埋
註
參考
出面網頁
Wikiwand - on
Seamless Wikipedia browsing. On steroids.
Remove ads