防禦式編程

防禦式編程係編程上用到嘅一種設計原則，講緊寫源碼嗰陣要一路諗埋最壞情況可能會係點：程式通常都會攞某啲數據做輸入，而程式出錯好多時都係源於啲輸入唔啱款，例如個程式要整數做輸入，但個輸入係字符；採取防禦式編程嘅編程員會思考假如個輸入唔啱款，點先可以避免出錯。

基本概念

睇埋：程式出錯

譬如係以下嘅短程式，編寫嚟做加法嘅，個程式會攞兩個整數 a 同 b 做輸入，並且將兩個數加埋嘅和俾出嚟做輸出，編程員有考慮到一種情況，可能 a 同 b 唔係有效嘅數值，於是佢就寫多段碼，教部電腦喺呢種情況下要點做，簡化版^[1]：

function add(a, b) { // add 呢個子程序，攞 a 同 b 做輸入...
  if (a is not a valid number) { // 如果 a 唔係一個有效嘅數值...
    throw new Error('invalid first number to add ' + a); // ... 就產生例外狀態
  }
  if (b is not a valid number) { // 如果 b 唔係一個有效嘅數值...
    throw new Error('invalid second number to add ' + b); // ... 就產生例外狀態
  }
  return a + b; // 俾 a + b 嘅結果做輸出。 
}

上面嘅例子用咗所謂嘅例外處理，即係即時打斷程式嘅流程，進入例外處理，如果冇定義對應嘅例外處理，就會出錯誤訊息，然後即刻中止程式運作。

點解重要

内文：容錯能力

防禦式編程能夠提高程式嘅容錯能力。容錯能力係講緊一個系統即使出現部分錯誤或者元件失效，依然能夠繼續運作並且維持基本功能。容錯能力唔係話要求系統零錯誤，而係設計到就算有問題發生，都唔會搞到成個系統崩潰^[2]。例外處理可以算係容錯能力嘅一種實踐。

容錯能力相當重要。呢種能力確保系統可靠，對於銀行系統、航空交通控制、醫療設備呢啲關鍵領域嚟講特別重要，因為呢啲領域上用嘅系統一旦崩潰，可以引致人命傷亡同埋財產損失。其次，容錯能力能夠改良用家體驗，用家唔洗成日受到啲細小錯誤阻礙。

睇埋

• 電腦保安
• 資料類型
• 程式除錯
• 可用度