陳方安生獲十成按揭謠言

陳方安生獲十成按揭謠言，係指香港前政務司司長陳方安生被指控以權謀私獲得超出上限按揭貸款嘅謠言，曾經被一啲親中陣營用來攻擊泛民主派。

事件起源

1993年，陳方安生擔任布政司嗰陣購買價值780萬，位於玫瑰新邨物業，當時傳出佢獲得銀行十成按揭嘅謠言。當時嘅規定，500萬文或以上嘅物業，最多只可以做七成按揭，因此陳方安生被質疑以權謀私。事件喺1995年被報道，當時陳方安生澄清自己同老公係連同另一物業做抵押先至獲得相當於780萬嘅貸款^[1]，港英政府亦有釐清陳方安生並無違規^[2]。

陳太參與2007年立法會補選，謠言再被提及

2007年8月8號，民建聯港島區立法會議員馬力死咗，佢嘅議席空缺，需要進行補選。陳方安生喺勝出泛民主派初選後出戰呢次選舉。因為陳太出選，謠言再度被廣泛流傳，被一啲親中陣營政治人同媒體用來喺選舉論壇等場合質疑佢^[3]。

質疑陳太嘅聲音

其中民建聯陳雲生走去廉政公署投訴^[4][5][6]。另外，前廉政公署副執行處長徐家傑亦再次攞呢件事質疑陳方安生，並表明支持親中陣營葉劉淑儀。佢又以「納稅人」名義向陳太同律政司司長黃仁龍發公開信，要求陳太澄清同埋律政司查明真相^[7][2]。不過，有評論就認為，當年徐家傑當年因涉嫌同中國國安人員過從密而被陳太建議撤去其廉政公署副執行處長一職，所以依家走出嚟抹黑陳太^[8]。

當時對謠言嘅反駁同批評

怡居地產常務董事、中原地產創辦人王文彥當時亦有寫文章反駁呢種說法^[9]。另外，唔少泛民主派都有公開批評親中陣營借題發揮嘅做法，其中湯家驊話呢啲係陳年舊貨，李柱銘就形容徐家傑所作所為係文革式手段，呼籲市民唔好中計^[2]。

選舉後跟進

立法會財經事務委員會喺2008年1月29號通過動議建議佢向公眾進一步交代^[10]，但最終政府並無就事件起訴任何人。