葉劉淑儀
From Wikipedia, the free encyclopedia
Remove ads
「劉淑儀」跳轉到呢度。想搵香港女演員，請睇「劉淑儀 (演員)」。葉劉淑儀，GBM，GBS，JP（英文：Regina Yip Lau Shuk Yee，1950年8月24號—），簡稱葉劉，係香港政府前官員同公務員，第四、五、六、七屆香港立法會議員。2022年7月起，擔任行政會議召集人。
.svg){kind=link}
Remove ads
生平
葉劉淑儀鄉下響廣東南海羅村。老竇劉福成係星加坡華僑，阿媽華彩鳳係佢老竇嘅妾侍。
葉劉淑儀嚮聖士提反女子中學、香港大學文學院、格拉斯哥大學、史丹福大學畢業。響主權移交前響港英政府做人民入境事務處處長，係香港史上第一個做紀律部隊阿頭嘅女性。特區政府成立後，葉劉淑儀響1998年7月畀嗰時嘅特首董建華委任做保安局局長。
響保安局局長任內，葉劉淑儀嘅政績引起爭議。響處理居港權同《公安條例》修訂等等棘手議題上，有人話佢強硬果斷，係特區唔少得嘅「鐵娘子」。葉劉淑儀曾經係特區政府民望最高嘅局長，但自從佢響2002年9月開始推銷《基本法23條》本地立法以後，由於畀人話佢態度輕佻傲慢，又不時發表大爭議性嘅言論，令佢民望一路跌，至2003年7月1號50萬人上街遊行後，佢民望更跌落谷底，做咗最唔受歡迎嘅政府官員。同時亦有人借用佢其嘅髮型，話佢「掃把頭」。最後《23條》立法擱置，佢自己亦響同年7月16號辭職，成為首批辭職嘅問責局長之一。
落台後，葉劉淑儀去美國進修，2006年學成返香港，而且重新投入政壇，搞匯賢智庫，自任主席，就社會事務發表意見，令外界揣測佢有意競逐2008年香港立法會選舉，以至於2012年香港特別行政區行政長官選舉。至2007年9月27號，佢向外界公佈參加立法會港島選區補選，同包括佢前上司陳方安生等7個人爭補選議席，不過佢輸咗畀陳方安生。
2008年，葉劉淑儀再次喺港島區參選，當選成為香港立法會議員，隨後兩屆，佢亦能成功冧莊。
2011年，葉劉淑儀同田北辰、史泰祖等人創立新民黨，並成為創黨主席。
2011年8月，葉劉淑儀話會「犧牲」自己參選第四屆行政長官[3]。2012年2月20號，葉劉淑儀宣佈參選行政長官選舉，佢認為另外兩位候選人唐英年同埋梁振英都出現嚴重誠信問題，希望參選能夠畀選委同市民多一個選擇[4]。不過佢喺提名截止前未能獲得所需嘅150個提名票，而放棄參選。同年連任立法會議員，之後加入行政會議。
2014年，新民黨同公民力量結盟，而佢就成為公民力量會長。
佢喺2016年香港立法會選舉入面競逐連任成功。同年12月15號，葉劉淑儀正式宣布參選第5屆香港行政長官選舉，但最後無攞到足夠提名。
佢喺2021年香港立法會選舉入面競逐連任成功。
2022年7月，擔任新一屆行政會議召集人[5]。
Remove ads
屋企
劉淑儀喺1981年12月10號嫁畀正興建築創辦人葉正平個仔葉文浩，最初係由屋企嘅工人介紹嘅，兩個人只係拍咗拖五個月，但係呢頭婚事受到葉文浩幾個妹嘅反對，葉正平更加向法庭申請禁制令，唔准佢哋兩個用自己個名派帖，最後葉家喺擺酒當日全部缺席[6][7]。
葉文浩個妹葉文心就解釋話，1981年5月阿媽啱啱過身，未落葬就搞喜事唔係太好，但係葉劉堅持要喺嗰時結婚。
1983年，老爺葉正平過身，但佢嘅遺產淨係傳畀葉家嘅三姊妹，葉文浩同大佬葉文山不滿，就向法庭申請遺囑無效，不過法院最後都係判葉家三姊妹贏咗，葉文浩更加因為噉同佢啲妹決裂。到1989年，佢個女葉榮欣出世。
1996年，葉文浩發現有肝癌，年零之後就死咗，之後佢就要寡母婆湊大個女。
政治立場同爭議
葉劉淑儀係香港親中派人士，自2012年起做埋行政會議成員。佢亦曾經唔止一次對歐美國家政府作出錯誤指控。不過，佢喺LGBT權益上嘅問題就比起其他親中派開明，支持佢哋擁有更平等嘅權利。
引述希特拉靠民主選舉上台謠言
内文：希特拉靠民主選舉上台謠言
喺推動香港就基本法23條立法期間，當時做保安局局長嘅葉劉淑儀就曾經話民主幫助希特拉上台，並導致後嚟嘅大屠殺，仲話民主唔係解決所有問題嘅萬靈丹。呢句話當時引起社會嘩然[8][9]。
不過，好多人都會反駁，指責當時希特拉當時所用嘅暴力手段，以及當時所謂嘅民主選舉並無俾到真正人民選擇。
否認新疆種族滅絕
新疆維吾爾族人受到中共嘅大清洗，受到迫害、強迫勞動、宗教歧視等議題，喺2014年起開始受到關注。而美國兩任國務卿蓬佩奧同布林肯，都將中國針對新疆維吾爾族嘅行為定義為「種族滅絕」。但葉劉淑儀就曾經喺Twitter引中國女星迪麗熱巴作例子，質疑呢個說法。另外，喺2021年2月，葉劉淑儀訪問網上群組Save HK嘅創辦人，就再質疑指控無證據[10][11]。
葉劉淑儀喺Twitter嘅言論，當時就受到唔少外媒嘅批評同質疑。《經濟學人》編輯Don Weinland批評，形容佢呢個Post可能係世界上最卑鄙嘅推文。路透社國際新聞編輯Gerry Doyle就反問，黑人音樂巨星Jimi Hendrix係60年代最紅嘅音樂人，係咪咁樣就可以證明當年美國無種族歧視[11][12]。
另外，國際社會因為中共對新疆作出種族清洗嘅行為，對中國進行制裁，有啲時裝品牌亦宣布唔再用新疆棉，引起咗唔細嘅風波。葉劉淑儀亦隨即表態支持新疆棉花，又批評佢自己有用開嘅Burberry品牌對新疆作出失實同無理指控，話要停用Burberry產品[13]。
收受時代生活集團利益爭議
2016年11月，時事評論員黃世澤喺自己嘅網誌，以及立場新聞，都分別揭發時代生活集團多名管理層對葉劉淑儀、田北俊同容海恩三名新民黨立法會議員，喺2016年香港立法會選舉嘅競選工程入面，捐助近50萬，其中一名管理層葉家明更加係新民黨成員。黃世澤質疑，葉劉淑儀收咗時代生活集團咁多錢，又參與行政會議同立法會發展事務委員會，有利益衝突之嫌[14][15]。
被指錯誤指控美國喺烏克蘭資助生化武器實驗室
2022年3月25號，葉劉淑儀喺Facebook專頁發布兩則宣稱「霍士新聞踢爆美謊言」嘅帖文，內容轉載佢之前喺《明報》嘅文章，當中宣稱俄羅斯國防部喺3月6號公布喺烏克蘭境內發現由美國資助嘅生化武器實驗室，又話引述美國《霍士新聞》（Fox News）電視節目主持人卡臣（Tucker Carlson）嘅批評以及美國國務院政治事務國務次卿盧嵐（Victoria Nuland）親口承認，證實呢個說法。葉劉淑儀又指控美國傳媒同政府一直欺騙人民。但事實查核實驗室之後驗證，葉劉指所謂親口承認嘅美國官員只係提到烏克蘭有「生物研究設施」，唔等於「生化武器實驗室」，亦冇提到係咪屬於美國或者由美國資助，`更加冇承認烏克蘭有生化武器或生化武器實驗室。事實查核實驗室批評，葉劉淑儀咁做係發表誤導內容[16]。
發放虛假信息指控英國議會制度封閉
喺2022年8月，佢曾經公開指控英國議會制度封閉，每區得7－8萬選民，比起香港立法會選區少，幾萬票就贏，以票數計算民意授權，英國國會議員比所有香港立法會議員低。不過香港嘅特首選舉或立法會功能組別選舉，不論係喺北京未經諮詢或香港人同意強行修改之前或之後，都有人只得幾百票，甚至冇競爭對手下當選，但葉劉淑儀就未有提及，言論被一啲人批評[17][18]。
選舉經歷
2021年，佢喺李家超無提政綱嘅情況下，有份提名李家超參與2022年香港行政長官選舉[19]。
個人榮譽
部分公職
其他
睇埋
攷
出面網頁
Wikiwand - on
Seamless Wikipedia browsing. On steroids.
Remove ads