陸氏廣裕宗祠

陸氏廣裕宗祠，亦叫廣裕祠（粵拼：gwong2 jyu6 ci4；英文：Guang Yu Ancestral Hall^[1]），係祭祀南宋宰相陸秀夫同後人陸廣裕、陸從興嘅祠堂^[2]，喺廣東從化嘅太平鎮錢崗村。

陸氏廣裕宗祠
主祀	陸秀夫 陸從興（五世祖） 陸廣裕（十一世祖）
家族信息
家族	錢崗陸氏
起源	江蘇鹽城
修建史
始建	1406年
重修	1553年 1639年 1669年 1807年 1915年
方位
地址	廣州市從化區太平鎮錢崗村
朝向	坐北朝南
現時尚存 經已掛牌
登錄名	廣裕祠
等級	中華人民共和國全國重點文物保護單位
分類	古建築
籌	6-683
登錄時間	2006年

祠堂喺明朝永樂四年（1406年）起，留落五次重修記錄^[2][3]，所以專家叫佢做「嶺南地區古祠堂建築嘅年代標尺」^[4]。2002年，被定爲廣州市文物保護單位，同年升爲廣東省文物保護單位^[2]；2006年升做國家級。陸氏廣裕宗祠攞過2003年度聯合國教科文組織亞太地區文化遺產保護獎（英文：the Award of the 2003 UNESCO Asia-Pacific Heritage Awards for Culture Heritage Conservation）^[4]至高級數嘅卓越獎（英文：Award of Excellence）^[1]。

建築

廣裕祠坐北向南^[5]，三間三進，建築面積816平方，佔地面積992平方，磚木石結構；建築愛咗淡色做主色調，同廣府祠堂嗰隻豪華氣派款爭得遠^[6]。

廣裕祠堂由廣裕祠主體、翼牆同照壁構成。廣裕祠堂前廣場開闊，祠堂正門前邊嘅照壁係一埲「八」字形、用青磚砌成嘅瓦檐結構磚牆。

祠堂分前廳、中堂同後堂，前闊13.80米，總進深44.20米，主座三沓廳堂中間都係木構架。兩邊山牆承重、屋面素瓦、屋頂係挑山，有北方建築風格。祠堂正門門聯「詩書開越 忠孝傳家」，上聯講西漢陸賈同趙佗傾掂歸順朝廷，下聯講南宋陸秀夫對朝廷嘅忠誠。前院兩邊廂廊連接前廳同中堂。中堂結構同前廳一樣，都係擡樑式結構，八碌木質稜柱，樑架構件嘅雕刻做工精緻過前廳，雀替、駝峰、斗栱多數用卷雲紋飾^[5]。成間祠堂南北風格兩溝。

廣裕祠西更樓上高嘅「江城圖」封檐板有600年歷史，長8.7米，闊0.3米，畫出咗清朝廣州珠江河北岸沿江城市景觀同鄉下嘅生活風情：江邊有捉棋同釣魚嘅伯爺公、笠高帽嘅番鬼仔，重有村屋同舖頭；當其時東邊嘅大沙頭重係郊區，幅圖重見到斬柴、養牛羊呢啲農耕景象^[6]。